Bavariya Nyukasl Yunayted hujumchisi Entoni Gordonni o‘z safiga qo‘shib olishni maqsad qilgan, biroq bu transfer amalga oshishi uchun nemis klubi oldida bir qator jiddiy to‘siqlar turibdi. Sport Bild xabariga ko‘ra, Myunxen klubi ushbu transfer uchun zarur bo‘lgan 85 million yevrodan ortiq mablag‘ni topishi kerak. Bu haqda Goal.com xabar beradi.
Mablag‘ni shakllantirish uchun Bavariya ijarada o‘ynayotgan futbolchilarni doimiy ravishda sotib yuborishi talab etiladi. Xususan, Joau Palinya (Tottenxem), Sacha Boey (Galatasaroy) va Brayan Saragosa (Roma) kabi o‘yinchilarning transferi klub g‘aznasini to‘ldirishga xizmat qilishi mumkin.
Sport direktori Maks Eberl ushbu transferni amalga oshirish uchun klub boshqaruv kengashidan rozilik olishi kerak. Uli Xyones va Karl-Xayns Rummenigge boshchiligidagi kuzatuv kengashining ehtiyotkorona yondashuvi muzokaralarni qiyinlashtirishi mumkin.
Entoni Gordonning o‘zi ham Bundesligaga o‘tishga qiziqish bildirmoqda va Bavariya vakillari bilan dastlabki suhbatlarni o‘tkazib ulgurgan. Garchi tomonlar hali rasmiy muzokaralarni boshlamagan bo‘lsa-da, 25 yoshli futbolchi kelasi yozda yangi chaqiriqni qabul qilishga tayyor.
“Zamin”ni Telegramʻda oʻqing!
