«Manchester Siti» jamoasida yozgi o‘zgarishlar oldidan hissiyotlarga boy kecha tashkil etildi. Jamoaning tajribali futbolchilari Bernardo Silva va Jon Stounz kecha tunda Manchester shahridagi mashhur “Lui” restoranida maxsus xayrlashuv ziyofatini uyushtirdi.
Tadbirga klubning deyarli barcha futbolchilari taklif qilingan bo‘lib, ular o‘z rafiqalari va qiz do‘stlari bilan ishtirok etdi. Kecha jamoa a’zolari uchun o‘ziga xos norasmiy yig‘in va mavsum yakuniga bag‘ishlangan samimiy uchrashuvga aylandi.
Manbalarga ko‘ra, tadbirda jamoaning sobiq a’zolari ham ko‘rinish bergan. Xususan, “shaharliklar” tarixida muhim o‘rin tutgan Kolo Ture va Kayl Uoker ham kechada ishtirok etgani muxlislar e’tiborini tortdi.
O‘zbekistonlik himoyachi Abduqodir Husanov ham mazkur tadbir mehmonlari orasida bo‘lgan. Yosh futbolchining Yevropadagi katta yulduzlar bilan bir davrada qatnashishi o‘zbek muxlislari orasida ham qizg‘in muhokama qilinmoqda.
Kuzatuvchilar fikricha, bu kabi yig‘inlar jamoa ichidagi muhit va birdamlikni yanada mustahkamlashga xizmat qiladi. Ayniqsa, uzoq va og‘ir mavsumdan keyin futbolchilar uchun bunday norasmiy kechalar ruhiy dam olish imkonini beradi.
Shu bilan birga, Bernardo Silva va Jon Stounzning xayrlashuv kechasi uyushtirgani kelajakda ayrim futbolchilar klubni tark etishi mumkinligi haqidagi taxminlarni ham kuchaytirdi. Ayrim ingliz nashrlari bu yig‘inni ehtimoliy o‘zgarishlar oldidan tashkil etilgan maxsus kecha sifatida baholamoqda.
Hozircha “Manchester Siti” rahbariyati yoki futbolchilar tomonidan rasmiy bayonot berilmagan. Biroq muxlislar klubda katta transferlar va tarkibiy o‘zgarishlar bo‘lishi mumkinligini taxmin qilishmoqda.
“Zamin”ni Telegramʻda oʻqing!
