“Manchester Siti” bosh murabbiyi Xosep Gvardiola juma kungi matbuot anjumanida jamoa yarim himoyachisi Rodrining hozirgi holati haqida fikr bildirdi. Ispaniyalik mutaxassisning so‘zlariga ko‘ra, futbolchi hali o‘zini to‘liq tayyor va qulay his qilayotgani yo‘q.
Rodri so‘nggi bir nechta uchrashuvni, jumladan, “Everton”ga qarshi bahsni ham o‘tkazib yubordi. O‘sha o‘yin 3:3 hisobida yakunlangan va “Manchester Siti” ikkinchi bo‘limda ancha tartibsiz harakat qilgani muxlislar hamda mutaxassislar e’tiboridan chetda qolmagan.
Gvardiola Rodrining holati yaqin vaqt ichida yana bir bor baholanishini aytdi. Uning ta’kidlashicha, klub tibbiy shtabi futbolchining tayyorgarlik darajasini bugun kechroq yoki ertaga tekshirib ko‘radi.
“Rodri hali ham o‘zini to‘liq qulay his qilayotgani yo‘q. Uning holatini bugun kechroq yoki ertaga baholaymiz”, — dedi Gvardiola.
Shu bilan birga, “Siti” ustozi “Everton”ga qarshi o‘yindagi muammolarni Rodrining yo‘qligi bilan bog‘lashni istamadi. Uning fikricha, jamoa raqibga imkoniyatlarni o‘zi taqdim etgan va buni bir futbolchining maydonda bo‘lmagani bilan oqlab bo‘lmaydi.
“Everton”ga qarshi ikkinchi taymdagi tartibsiz o‘yinga Rodrining yo‘qligi ta’sir qildimi? Yo‘q. Biz raqibga gol urish imkonini o‘zimiz berdik. Bu Rodri maydonda bo‘lmagani uchun emas”, — deya ta’kidladi ispaniyalik murabbiy.
Gvardiolaning bu fikri “Manchester Siti”da mas’uliyat bir futbolchiga emas, butun jamoaga tegishli ekanini ko‘rsatadi. Albatta, Rodri jamoa o‘yinida muhim figura hisoblanadi. U markazda muvozanat saqlaydi, hujum va himoya o‘rtasidagi bog‘lamni ta’minlaydi, raqib bosimini yumshatadi. Ammo Gvardiola uchun bu yo‘qotish xatolarga bahona bo‘la olmaydi.
“Manchester Siti” kabi yuqori darajadagi klubda har bir futbolchi mas’uliyatni his qilishi kerak. Ayniqsa, mavsumning hal qiluvchi pallasida kichik e’tiborsizlik ham qimmatga tushishi mumkin. “Everton”ga qarshi o‘yindagi 3:3 hisobidagi durang ham shuni yana bir bor ko‘rsatdi.
Endi barcha e’tibor Rodrining tiklanish jarayoni va uning keyingi o‘yinga tayyor yoki tayyor emasligiga qaratilgan. 9 may kuni “Manchester Siti” o‘z maydonida “Brentford”ni qabul qiladi. Bu bahsda Gvardiola shogirdlaridan ancha tartibli, diqqatli va sovuqqon o‘yin kutishi tabiiy.
Rodri maydonga qaytsa, “Siti” markazi yanada ishonchli ko‘rinish oladi. Ammo u ishtirok etmasa ham, jamoa o‘z darajasini saqlab qolishi shart. Chunki chempionlikka da’vogar klublar bahona bilan emas, natija bilan gapiradi.
“Zamin”ni Telegramʻda oʻqing!
