“Barselona”ni qatorasiga ikkinchi marta Ispaniya chempionligiga olib kelgan germaniyalik mutaxassis Hans-Diter Flik kelajagi borasida yakuniy qarorga keldi. Kataloniyaliklar bosh murabbiyi klub bilan hamkorlikni davom ettirishga rozi bo‘ldi.
Jurnalist Florian Plettenberg ma’lumotiga ko‘ra, tomonlar yangi shartnoma bo‘yicha barcha asosiy shartlarni kelishib olgan. Yangi bitim 2028 yil yoziga qadar amal qiladi va yana bir mavsumga uzaytirish imkoniyatini ham o‘z ichiga oladi.
Hans-Diter Flikning o‘zi ham “Barselona”da qolishini shaxsan tasdiqladi.
“Men “Barselona” bilan yangi shartnoma imzolayman”, — dedi murabbiy.
Ayni paytda mutaxassisning amaldagi shartnomasi 2027 yil yozigacha mo‘ljallangan. Yangi kelishuv bo‘yicha rasmiy e’lon keyinroq berilishi kutilmoqda. Ammo asosiy masala hal bo‘lgan: Flik Kataloniyada qoladi va jamoa loyihasini davom ettiradi.
Bu qaror “Barselona” uchun juda muhim ahamiyatga ega. Chunki Flik qisqa vaqt ichida jamoani tartibga soldi, g‘oliblik ruhini qaytardi va “ko‘k-anorranglilar”ni yana Ispaniya futbolidagi asosiy kuchga aylantirdi.
Joriy mavsumda “Barselona” La Liga chempionligini muddatidan oldin qo‘lga kiritdi. Kataloniyaliklar 91 ochko bilan turnir jadvalida peshqadam bo‘lib turibdi. Madridning “Real” klubi esa 77 ochko bilan ikkinchi o‘rinni egallagan. Chempionat yakuniga hali uch tur qolgan.
Flikning jamoada qolishi futbolchilar uchun ham, muxlislar uchun ham katta ishonch beradi. Chunki murabbiy atrofida aniq tizim shakllandi: intizom, yuqori pressing, tezkor hujumlar va yosh futbolchilarga ishonch. “Barselona” aynan shu yo‘nalishda yanada o‘sishni istamoqda.
Germaniyalik mutaxassisning ketma-ket ikki marta Ispaniya chempionligini qo‘lga kiritgani uning Kataloniyadagi loyihasi tasodif emasligini ko‘rsatdi. Endi klub oldida yanada katta vazifalar turibdi — La Ligada ustunlikni saqlab qolish va Yevropada ham katta sovrinlar uchun kurashish.
Qisqasi, “Barselona” o‘z g‘olib murabbiyini saqlab qolmoqda. Flik qoladi, loyiha davom etadi, raqiblar esa tayyor tursin — Kataloniyada “ikkinchi mavsum sindromi” emas, “yana davom etamiz” rejimi yoqilgan.
“Zamin”ni Telegramʻda oʻqing!
