Angliyalik vinger Entoni Gordon Nyukasl Yunayteddan Barselona safiga oʻtganidan soʻng oʻzining ulkan maqsadlarini ochiqladi. Kataloniya klubi bilan besh yillik shartnoma imzolagan 25 yoshli futbolchi jamoaning oltinchi marta Chempionlar ligasi gʻolibi boʻlishi shartligini taʼkidladi. Transfer qiymati 80 million yevroni tashkil etgan Gordon ushbu transferni oʻzining ushalgan orzusi deb atadi. Bu haqda Goal.com xabar beradi.
Klub muzeyiga tashrifi davomida Gordon Barselona qoʻlga kiritgan beshta nufuzli yevrokubokni koʻzdan kechirar ekan, jamoaning kelajakdagi maqsadini aniq belgilab berdi. "Bizga oltinchisi kerak", — dedi hujumchi klub rasmiy kanali orqali tarqatilgan videoda. U oʻzining "koʻk-anorranglilar" safidagi faoliyati davomida Yevropaning eng nufuzli turnirida zafar quchishga yordam berishiga umid bildirdi.
Gordon yangi jamoasining bosh murabbiyi Hansi Flick bilan ham ilk uchrashuvini oʻtkazdi va germaniyalik mutaxassis haqida ijobiy fikrlar bildirdi. "Suhbatimiz juda yaxshi va samimiy oʻtdi. U ajoyib inson va meni oʻzimni juda qulay his qilishimga yordam berdi", — deya taʼkidladi angliyalik futbolchi. U tezroq muxlislar qarshisida maydonga tushishni va koʻplab sovrinlar yutishni intiqlik bilan kutayotganini qoʻshimcha qildi.
Shuningdek, Entoni Gordon jamoaning yosh yulduzi Lamine Yamal va Frenkie de Jong kabi yangi jamoadoshlari bilan tanishishga ulgurgan. Qiziqarli savol-javoblar davomida u Lamine Yamalni jamoaning eng zamonaviy kiyinadigan futbolchisi deb atadi. Mutolaaga boʻlgan qiziqishi bilan tanilgan Gordon, hazil tariqasida kiyinish xonasida "Kataloniya kitobxonlar klubi"ni tashkil etishi mumkinligini ham aytib oʻtdi.
“Zamin”ni Telegramʻda oʻqing!
