Anthropic kompaniyasi yuridik firmalar uchun avtomatlashtirilgan yordam koʻrsatishga moʻljallangan yangi chatbot funksiyalarini ishga tushirdi. Ushbu yangiliklar joriy yil boshida taqdim etilgan Claude for Legal platformasini kengaytirib, huquqning turli sohalari uchun maxsus plaginlar va MCP (Model Context Protocol) ulagichlarini oʻz ichiga oladi. Bu haqda Techcrunch.com xabar beradi.
Yuridik texnologiyalar bozori shiddat bilan rivojlanmoqda. Xususan, Harvey va Legora kabi startaplar katta sarmoyalar jalb qilib, huquqiy jarayonlarni avtomatlashtirish boʻyicha faol ish olib bormoqda. Anthropic oʻzining yangi vositalari orqali hujjatlarni qidirish, tahlil qilish, sud ishlariga tayyorgarlik koʻrish va shartnomalar tuzish kabi murakkab vazifalarni yengillashtirishni maqsad qilgan.
Yangi MCP ulagichlari Claude modelini DocuSign va Box kabi yuridik firmalar kundalik ishda foydalanadigan dasturlar bilan integratsiya qilish imkonini beradi. Shuningdek, Thomson Reuters kabi yuridik tadqiqot platformalarini ham tizimga ulash mumkin. Kompaniya vakillarining taʼkidlashicha, yuridik sektor sunʼiy intellektni joriy etishda eng tez oʻsayotgan yoʻnalishlardan biriga aylandi.
Shu bilan birga, yuridik sohada sunʼiy intellektdan foydalanish ayrim xavflarni ham keltirib chiqarmoqda. Oʻtgan davr mobaynida ChatGPT orqali notoʻgʻri yoki soxta iqtiboslar bilan toʻldirilgan hujjatlar tayyorlagan advokatlar va hatto sudyalar bilan bogʻliq noxush holatlar kuzatildi. Mutaxassislar AI tomonidan yaratilgan sifatsiz yuridik hujjatlar sud tizimiga ortiqcha yuklama berayotganidan xavotirda.
“Zamin”ni Telegramʻda oʻqing!
