Xiaomi kompaniyasi HyperOS 3 operatsion tizimi uchun interfeys xatolarini tuzatish, bildirishnomalar bilan bogʻliq muammolarni bartaraf etish va oʻyin rejimlarining barqarorligini taʼminlashga qaratilgan muhim yangilanishlar seriyasini eʼlon qildi. Bu haqda Ixbt.com xabar beradi.
Ushbu yangilanish bir vaqtning oʻzida bir nechta qurilmalar liniyasini, jumladan, flagman Xiaomi 17 seriyasi, Redmi K80 va K90, Redmi Turbo 5 hamda boshqa modellarni qamrab oladi. Avvalroq foydalanuvchilar holat satridan tortib, ilovalardagi shriftlargacha boʻlgan interfeys elementlarining notoʻgʻri koʻrinishi boʻyicha shikoyat qilishgan edi.
Shuningdek, bildirishnomalar yetkazilishidagi uzilishlar va Game Turbo funksiyasining beqaror ishlashi kabi oʻyin ssenariylaridagi xatolar qayd etilgan. Endilikda kompaniya tizimning ravonligi va barqarorligini oshirishga qaratilgan kompleks tuzatishlar toʻplamini taqdim etdi.
Xususan, Xiaomi 17 Pro Max modelida tasvirlarni toʻliq ekranda koʻrgandan soʻng holat satrining yoʻqolib qolishi muammosi bartaraf etildi. Xiaomi 15 Ultra qurilmasida SMS-bildirishnomalar yetkazilishi yaxshilandi, Redmi K90 seriyasida esa ilovalarning ishdan chiqishi va vizual buzilishlar tuzatildi.
Redmi Turbo 5 foydalanuvchilari uchun ilovalarning oʻz-oʻzidan ishga tushishi muammosi hal qilingan boʻlsa, K80 liniyasida oʻyin rejimi sozlamalari barqarorlashtirildi. Ushbu yangilanishlar tizimning umumiy samaradorligini sezilarli darajada oshirishi kutilmoqda.
“Zamin”ni Telegramʻda oʻqing!
