2026 йил бошиданоқ мамлакатда хизматлар соҳасида сезиларли жонланиш кузатилмоқда. Хусусан, январ ойида яшаш ва овқатланиш хизматлари умумий ҳажми қарийб 13,8 трлн сўмга етгани иқтисодий фаолликнинг ошганидан дарак беради. Бу кўрсаткич ўтган йилнинг шу даврига нисбатан 27,1 фоизга юқори бўлиб, соҳа барқарор ривожланаётганини яққол намоён қилмоқда.
Мутахассислар фикрича, бундай ўсиш туризм оқимининг кўпайиши, ички саёҳатлар фаоллашуви ва хизмат кўрсатиш инфратузилмасининг кенгайиши билан бевосита боғлиқ. Яъни, одамлар кўпроқ саёҳат қиляпти, кўпроқ ресторан ва меҳмонхоналар хизматидан фойдаланяпти — бу эса бозорни қиздиряпти.
Ҳудудлар кесимида қаралганда, энг юқори натижа анъанавий равишда пойтахт ҳиссасига тўғри келди. Тошкент шаҳрида яшаш ва овқатланиш хизматлари ҳажми 2,6 трлн сўмни ташкил этиб, бошқа ҳудудлардан анча илгарилаб кетган. Бу ерда меҳмонхона, кафе ва ресторанлар сони кўплиги ҳамда хизмат сифати юқори даражада экани муҳим омил ҳисобланади.
Иккинчи поғонада Қашқадарё ва Самарқанд вилоятлари жойлашган бўлиб, ҳар икки ҳудудда 1,7 трлн сўмлик хизматлар кўрсатилган. Самарқандда туризм омиллари, Қашқадарёда эса ички иқтисодий фаоллик ўсишга туртки бергани айтилади.
Наманган (1,4 трлн сўм) ва Фарғона (1,3 трлн сўм) вилоятлари ҳам юқори натижалар қайд этиб, хизматлар бозорида фаол иштирок этаётган ҳудудлар қаторига кирди. Шунингдек, Тошкент вилояти, Андижон, Хоразм ва Бухоро каби ҳудудларда ҳам барқарор ўсиш кузатилган.
Қолган вилоятлардаги кўрсаткичлар нисбатан камроқ бўлса-да, умумий тенденция ижобийлигича қолмоқда. Хусусан, Сурхондарё, Навоий, Жиззах ва Сирдарёда ҳам хизматлар ҳажми босқичма-босқич ошиб бормоқда.
Умуман олганда, рақамлар бир нарсани аниқ кўрсатяпти: Ўзбекистонда сервис соҳаси энди “иккинчи даражали” эмас, балки иқтисодиётнинг драйверларидан бирига айланяпти. Агар шу темп сақланса, яқин йилларда бу сектор янада кучайиб, янги иш ўринлари ва имкониятлар яратиши аниқ.
“Zamin”ни Telegram'да ўқинг!
