Ўзбекистонда сел-тошқин сувларидан самарали фойдаланиш ва қишлоқ хўжалиги ерларининг сув таъминотини яхшилашга қаратилган янги қарор қабул қилинди. Президентнинг “Сел-тошқин сувларидан самарали фойдаланишни таъминлаш чора-тадбирлари тўғрисида”ги қарорига мувофиқ, 2027 йилдан бошлаб республика ҳудудларида 5 та сел-сув омбори қурилиши режалаштирилмоқда.
Мазкур лойиҳалар орқали бир қатор ҳудудларда сув таъминотини яхшилаш кўзда тутилган. Хусусан, Самарқанд вилоятида 7 минг гектар, Тошкент вилоятида 2 минг гектар ҳамда Жиззах вилоятида 300 гектар ер майдонларининг сув билан таъминланиш даражаси оширилади. Бу эса қишлоқ хўжалиги маҳсулдорлигига ижобий таъсир қилиши кутилмоқда.
Шунингдек, сел-сув омборлари қурилиши натижасида янги ер майдонларини ўзлаштириш имконияти ҳам пайдо бўлади. Самарқанд вилоятида 3,3 минг гектар, Тошкент вилоятида эса 300 гектар янги ерлар қишлоқ хўжалиги айланмасига киритилиши режалаштирилган. Бу нафақат сув ресурсларидан оқилона фойдаланиш, балки янги иқтисодий имкониятлар яратишга ҳам хизмат қилади.
Қарор билан 2027–2030 йилларда қуриладиган сел-сув омборларининг манзилли дастури ҳам тасдиқланди. Унга кўра, лойиҳалар босқичма-босқич амалга оширилади. Сел-сув омборлари ва уларга тегишли иншоотлар, карьерлар ҳамда қурилиш майдонлари учун зарур ер участкалари қонунчиликда белгиланган тартибда жамоат эҳтиёжлари учун олиб қўйилиши мумкин.
Бунда жисмоний ва юридик шахсларга етказилиши мумкин бўлган мулкий зарарлар қонунчиликда белгиланган тартибда қоплаб берилади. Яъни лойиҳалар амалга оширилишида фуқаролар ва тадбиркорлар ҳуқуқлари инобатга олиниши белгиланган.
Қисқаси, Ўзбекистонда сел-тошқин сувларини беҳуда оқизиб юбормасдан, улардан қишлоқ хўжалиги ва сув таъминотида самарали фойдаланиш мақсад қилинмоқда. 5 та янги сел-сув омбори қурилиши ҳудудларда сув танқислигини юмшатиш, янги ерларни ўзлаштириш ва аграр соҳада барқарорликни оширишга хизмат қилади.
“Zamin”ни Telegram'да ўқинг!
