Пентагон 11 сентябрь теракти жиноятчилари билан келишувни бекор қилди

^{Фото: Reuters}
2001 йил 11 сентябрдаги террорчилик хуружларини уюштирганлик иши бўйича уч судланувчи билан тузилган судгача келишув қисқа муддатли бўлиб чиқди, дея Euronews хабар берди.

20 август куни Пентагон раҳбари Ллойд Остин ўз хизмат баёнотида мазкур қарори ҳақида маълум қилган.

Унда Остин бу иш бўйича судгача келишувлар тузиш ваколатини Гуантанамодаги ҳарбий судда унинг кўриб чиқилишини назорат қилган бригада генерали Сюзан Эскаледан олиб ташлаганини айтган.

"Ушбу қарор учун жавобгарлик менда бўлиши керак", дейди Остин ўз баёнотида.

Айбланувчи Холид Шайх Муҳаммад ва унинг шериклари Валид бин Атташ ва Мустафо Аҳмад Адам ал-Ҳавсавий билан келишувга 31 июль куни эришилган эди. Учаласи ҳам ўлим жазосини умрбод қамоқ жазосига алмаштириш эвазига 3000 нафарга яқин одамни ўлдириш каби барча айбловларни тан олишга рози бўлган.

Америка ОАВларнинг таъкидлашича, бундай келишув жараённи кескин тезлаштиради ва судгача бўлган кўп йиллик жараёнларга якун ясайди.

Бироқ битимнинг тузилиши кўплаб республикачилар, жумладан, Вакиллар палатаси ва Сенатдаги партия етакчилари – Майк Жонсон ва Митч Макконнел, шунингдек, теракт қурбонларининг кўплаб оила аъзоларининг кескин танқидига сабаб бўлган. Жонсон буни қурбонларнинг яқинларига “тарсаки” деб атаган ва АҚШ вице-президентлигига номзод Ж.Д.Венс Америкага “террорчилар билан музокара олиб борадиган эмас, уларни йўқ қиладиган” президент кераклигини айтган.

Айбловга кўра, айнан Холид Шайх Муҳаммад Усама бин Ладенга теракт уюштиришнинг бундай шаклини таклиф қилган, кейин эса худкуш-террорчиларни шахсан танлаб, уларга кўрсатма берган. У 2003 йилда Покистонда ҳибсга олинган ва Гуантанамо қамоқхонасига юборилгунга қадар Марказий разведка бошқармаси қамоқхоналарида сақланган. “Замин” янгиликларини “Одноклассники”да кузатиб боринг