Борис Жонсон Трамп нега Украинага босим қилаётганини айтди

Британия собиқ бош вазири Борис Жонсон 24 феврал, уруш бошланганининг уч йиллиги муносабати билан Киевга борди. Зеленский билан учрашиб ҳамон Украинани қўллашда собит эканини айтган сиёсатчи ташрифи давомида украиналик журналист Дмитрий Гордонга қисқа интервю берди. 11 дақиқа давом этган суҳбатда Жонсон АҚШ президенти Трамп нега Украинага нисбатан бундай сиёсат юритаётганини тушунтирди.

Суҳбат Оқ уйдаги Трамп ва Зеленский ўртасидаги тортишувдан аввал ўтказилган. Имконингиз бўлса, рус тилига таржима қилиб жойланган бу интервюни кўришингизни тавсия қиламан, чунки Жонсон воқеаларга эксперт ёки оддий одам сифатида эмас, бутун бошли Британия ҳукуматини бошқарган сиёсатчи сифатида муносабат билдирган.

«Украинани яхши кўрадиган, қатъият билан қўллайдиган ва урушда ғалаба қозонишига ишонадиган одам сифатида бу давлат ҳақида Вашингтондан туриб ёлғон гаплар айтилаётганини эшитиш оғир. Кремл ўйлаб топган гаплар Оқ уйдаги бу масалаларни бошқалардан яхшироқ тушуниши керак бўлган одамлар томонидан айтилаётгани жирканч ва катта хато.

Украина урушни бошлади дейиш, Зеленскийни диктатор деб Путин билан солиштириш ақлга сиғмайдиган иш. Ҳа, буларнинг ҳаммаси ёлғонлиги кўриниб турибди», дейди Жонсон сўзи аввалида Трамп айтаётган гапларни қўлламаслигини тушунтираркан.

Дарвоқе, Жонсоннинг интервюсидан кейин Трамп Зеленскийни диктатор деганидан тонишга ҳам улгурди. Лекин жаноб Трамп Украина президенти сайланмаган диктатор дегани рост, бунинг исботи Kun.uz Youtube-каналида ҳам турибди.

Жонсонга кўра, Трамп айтаётган гапларининг кўпи рост эмаслигини ўзи ҳам билади ва у Зеленский келишувга қўл қўйиши учунгина шундай босим ўтказиш йўлини танлаган: «Трампни ҳурмат қилишим учун сабаблар етарли, у тинчлик истамоқда. Бу борада Америка президенти музокара ўтказиши керак бўлган уч томон бор: Украина, Европа ва Россия. Трамп уч томонни ҳам ҳаракатга келтирмоқчи. Масалан, Европа Украинани ҳимоя қилиш учун кўпроқ ҳаракат қилиши кераклигини айтмоқда, ахир Украина чиндан Европада. Британия ҳам ҳарбий харажатларни 2030 йилга бориб ЯИМнинг 3 фоизи даражасига етказиши керак. Трамп шу сабаб европаликларга босим қиляпти», дейди Жонсон.

Британия собиқ бош вазирига кўра, республикачилар орасида Трампнинг қулоғига бўлмағур гапларни валдирайдиган одамлар жуда кўп. Жонсон уруш кетаётган вақтда Путиндан интервю олган Трампнинг дўсти Такер Карлсонни ёқтирмаслигини яширмай, Трампни алдаётганларга айнан шу журналистни мисол қилган.

«Такер Карлсонга ўхшаган одамларнинг таъсир доираси жуда катта. Улар Трампнинг бошини уруш ҳақида бўлмағур гаплар билан тўлдирган. Трамп мана шундай скептикларни АҚШ урушдаги ёрдам учун Украинадан нимадир олишига ишонтирмоқчи.

Айтайлик, 1941 йилда АҚШ президенти Франклин Рузвелт британияликлардан жуда кўп пул, Кариб ҳавзасидаги ҳарбий базалари ва бошқа нарсалар олган. Эвазига ленд-лиз ҳисобига Британияни урушда қўллаган. Биласизми, Британия 2006 йилгача ўша ленд-лиз доирасида АҚШга қарз тўлаб келди. Шу сабаб Трамп ҳам Украинадан нимадир олишини кўрсатмоқчи. Минерал ресурслар бўйича келишув шу тариқа юзага келди», дейди сиёсатчи.

Жонсоннинг фикрича, келишувда жуда кескин бандлар бор, лекин Украина ўз келажаги учун уни имзолашга мажбур. Чунки келишув АҚШни Украинани қўллашга мажбур қилади.

«Менимча, Украинани келишувга қўл қўйиши керак. Ҳа, мен Украина тарафдори сифатида келишувдаги бандларни қўлламайман. Лекин бу келишув АҚШни эркин, суверен ва хавфсиз Украинани қўллашга мажбурлайди. Ҳа, АҚШ бу инвестицион фонддан 50 фоиз улуш олади. Лекин Украина хавфсизликда бўлмагунча фондга бир чақа ҳам тушмайди. Менимча, Украинани Москва назоратига ташлаб қўйгандан кўра бу келишувни имзолаган маъқул. Ахир келишув Трамп даврида ҳам АҚШни Украинани қўллашга мажбур қилади. Бу эса катта ютуқ», деди Жонсон.

Сиёсатчи Оқ уйдагилар Путин нима хоҳлаётганини тушунмаяпти деган фикрда: «Трамп масалани ҳудудий бўлиниш билан ҳал қилиш мумкин деб ўйлайди, лекин гап бунда эмас, Путин Украинани тўлиқ назорат қилишни истайди», дейди Жонсон.

Димтрий Гордон Жонсондан Трампнинг ўрнида бўлсангиз, эртага нима қилардингиз деб сўради. Жонсон қизиқ жавоб қайтарди ва бу гал ҳам Такер Карлсонни тилга олди.

«Энг аввал Конгрессдаги республикачиларга ахмоқ бўлишни бас қилишларини, кейин Такер Карлсонга энг яқиндаги бирор кўлга бориб калла ташлашини айтардим. Украинага ҳарбий ёрдамни ошириб, Путинга Владимир, сен ютқаздинг, Украинани қул қилмоқчи эдинг, мен бор эканман бундай бўлмайди, дердим.

Америка жамоатчилигини Украинага ёрдамга жалб қилиш учун балки мен ҳам минерал ресурслар келишувини имзолаган бўлардим ва Украинани НАТОга қабул қилиш жараёнини бошлардим. Худди 50-йилларда Германия билан бўлгани каби фақат Киев назорат қилаётган ерларни алянсга киритиб, интеграция жараёнини тезлаштирардик», дейди Жонсон.

“Замин” янгиликларини “Telegram”да кузатиб боринг