Қирғизистон Ички ишлар вазирлиги маълум қилишича, мамлакатнинг собиқ президенти Алмазбек Атамбаевнинг ўғли Қодирбек Атамбаев ва унинг бир неча тарафдори оммавий тартибсизликлар ташкил этганликда айбланмоқда.
Тергов маълумотларига кўра, ушбу шахслар парламент сайловлари натижалари эълон қилинганидан сўнг Конституцияга зид талаблар қўйиш ҳамда маъмурий бинолар, телерадиоузатиш объектлари, куч тузилмалари, қурол-яроғ омборлари ва жазони ижро этиш муассасаларини эгаллашга уринишни режалаштирган.
Тинтувлар давомида қуроллар, ўқ-дорилар, гранаталар, алоқа воситалари, ноқонуний ҳаракатлар режаси ва уларни молиялаштириш билан боғлиқ ҳужжатлар, наркотик моддалар ҳамда 150 минг доллар (тахминан 1,87 миллиард сўм) пул маблағлари мусодара қилинди.
Қирғизистон парламентига муддатидан олдин сайловлар жорий йилнинг 30 ноябрида бўлиб ўтади. Илгари бу сайловлар 2026 йил ноябрига режалаштирилган эди. Бироқ 25 сентябр куни амалдаги депутатлар ўз ихтиёри билан ваколатларидан воз кечишганини эълон қилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
