Эрон пойтахти ва қатор йирик шаҳарларда 28 декабрдан буён оммавий норозилик чиқишлари тўхтамаяпти. Норозиликларга асосий туртки сифатида мамлакатда чуқурлашиб бораётган иқтисодий қийинчиликлар тилга олинмоқда. Ахборот агентликлари маълумотларига кўра, Теҳрон ва Исфаҳонда ўтаётган намойишларга йирик университетлар талабалари ҳам қўшилган.
Айрим ҳудудларда норозилар билан полиция ўртасида майда тўқнашувлар қайд этилган. Қонун-тартибот идоралари оломонни тарқатиш учун кўздан ёш чиқарувчи газ қўллагани хабар қилинмоқда. Dpa агентлиги таъкидлашича, намойишлар тобора сиёсий тус ола бошлаган. Кўчаларда “Диктаторга ўлим” ва “Подшоҳ яшасин” каби шиорлар янграмоқда. Биринчи чақириқ Эрон олий раҳбари Али Хоманаийга қаратилган бўлиши мумкин, иккинчиси эса инқилобдан олдинги монархияни тиклаш ғоясини англатади.
Эрон президенти Масъуд Пезешкиён 30 декабр куни ички ишлар вазирига норозилар вакиллари билан мулоқот қилиш ва уларнинг қонуний талабларини тинглаш бўйича кўрсатма берганини маълум қилди. Унинг таъкидлашича, ҳукумат вазиятни барқарорлаштириш учун масъулият билан ҳаракат қилиши шарт.
AFP агентлигининг ёзишича, норозиликлар илк бор Теҳрондаги йирик бозорда бошланган. Аввал мобил телефон сотувчилари, кейин эса бошқа соҳада фаолият юритаётган тадбиркорлар гиперинфляция ва миллий валютанинг қадрсизланиши сабаб дўконларини ёпиб, норозилик билдирган. Айниқса, импорт товарлари билан ишлайдиган савдогарлар оғир аҳволга тушиб қолган.
29 декабр куни риал очиқ бозорда яна бир антирекорд қайд этди — бир АҚШ доллари қарийб 1,4 миллион риалга тенглашди. Шу ортидан Эрон Марказий банки раҳбари Муҳаммад Реза Фарзин истеъфога чиққан.
Айни пайтда Эрон иқтисодиёти юқори инфляция, қимматчилик ва ядровий дастур билан боғлиқ Ғарб санкциялари босими остида қолмоқда. Президент Пезешкиён эса яқин вақтларда инфляцияни жиловлаш ва аҳоли турмуш шароитини яхшилашга қаратилган чоралар кўрилишини ваъда қилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
