Ўзбекистон миллий футзал жамоаси 2026 йилги Осиё Кубоги саралаш босқичини муносиб тарзда якунлади. Қирғизистонда ўтказилган F гуруҳ учрашувларида футзалчиларимиз кучли ва таъсирли ўйинлари билан яна бир бор ўз салоҳиятини намоён этди.
Саралашнинг дастлабки икки баҳсида ўзбекистонликлар рақибларини йирик ҳисобда мағлубиятга учратди. Фаластинга қарши ўйинда жамоамиз 7:1 ҳисобида йирик ғалабага эришди. Шундан сўнг Шарқий Тимор билан кечган баҳсда ҳам айнан шундай ҳисоб — 7:1 қайд этилди. Бу ўйинларда терма жамоа ҳимояда ишончли, ҳужумда эса самарадор ўйини билан ажралиб турди.
Шу билан бирга, саралашнинг ҳал қилувчи учрашувида мезбон Қирғизистон терма жамоасига қарши беллашув қизғин тарзда кечди. Учрашувнинг илк қисмидаёқ мезбонлар устунликни қўлга киритишди ва ўз имкониятларидан унумли фойдаланишди. Ўзбекистон терма жамоаси охирги дақиқаларда қайтиш учун бор кучини ишга солди, Ҳусниддин Нишонов ва Илҳом Ҳамроев томонидан урилган голлар ҳисобни қисқартиришга имкон берди. Бироқ асосий вақт 3:2 ҳисобида Қирғизистон фойдасига якунланди.
Футзал бўйича Осиё кубоги-2026 саралаши
Ўзбекистон – Қирғизистон 2:3
Голлар: Ҳусниддин Нишонов 38, Илҳом Ҳамроев 39 – Максат Алимов 14, Самат Жанат уулу 22, Кайрат Кубаничов 25.
Шу тариқа, Ўзбекистон терма жамоаси гуруҳда 6 очко тўплаб, мезбонлардан кейинги иккинчи ўринни эгаллади ва 2026 йилги Осиё Кубогига йўлланмани қўлга киритди.
Эслатиб ўтамиз, футзал бўйича Осиё Кубоги 2026 йилнинг 27 январи — 7 феврали кунлари Индонезияда ўтказилади. Бу мусобақа нафақат қитъадаги энг кучли жамоаларнинг тўқнашуви, балки миллий терма жамоамизнинг янги имкониятларини намоён қилиш учун ҳам муҳим майдон бўлиб хизмат қилади.
«Замин»ни Telegram’да ўқинг!
