Туркиянинг номдор клуби — «Фенербахче» ҳужум чизиғини янги юлдуз билан мустаҳкамлаш ниятида. «Fotomaç» нашри ёзишича, жамоа Карим Бенземани жорий мавсум якунига қадар ўз сафида кўришни режалаштирмоқда.
Манбаларга кўра, жамоа бош мураббийи Доменико Тедеско клуб президенти Садеттин Саранга ҳужумда самарадорликни ошириш учун янги форвард зарурлигини маълум қилган. Бу эҳтиёж бир неча омил билан боғлиқ — Юссеф Эн-Несирининг беқарор формаси, Жон Дюраннинг жароҳати ва Женк Тосуннинг таркибдан чиқарилиши.
Шу сабабли, муҳокама қилинган бир нечта номзодлар ичида энг мақбул деб Карим Бензема танланган. Франциялик ҳужумчининг «Ал-Иттиҳод» билан тузилган шартномаси жорий мавсум охирида якунланади, бу эса трансферни амалга оширишни анча енгиллаштиради.
Маълумотларга кўра, «Фенербахче» раҳбарияти яқин ҳафталарда Бенземанинг агентлари билан алоқага чиқишни режалаштирмоқда. Агар музокаралар ижобий натижа берса, трансфер расман йўлга қўйилади.
Аввалроқ, 37 ёшли Бензема фаолиятининг сўнгги босқичини Европада давом эттиришни хоҳлаётганини билдирган эди. Бу эса «Фенербахче» учун катта имконият бўлиши мумкин — жамоа тажрибали форвард билан шартнома имзолаб, чемпионлик йўлида янада кучайиши мумкин.
Турк нашрлари таъкидлашича, агар Бензема «Фенербахче»га келса, у клуб тарихидаги энг нуфузли ҳужумчилардан бирига айланади. Ҳозирча музокаралар бошланмаган, аммо Истанбул жамоаси ўз ниятида қатъий.
Шундай қилиб, янги йилда Туркия футболида яна бир сенсация кузатилиши мумкин — Карим Бензема Европага қайтиб, «Фенербахче» сафида янги саҳифа очиши эҳтимолдан холи эмас.
“Zamin”ни Telegram'да ўқинг!
