Хорватиялик афсонавий ярим ҳимоячи Лука Модриć амалдаги шартномаси якунига етиб бораётган бир пайтда Милан клубидаги келажаги ҳақида тўхталиб ўтди. 40 ёшга яқинлашиб қолганига қарамай, у Массимилиано Аллегри жамоасида муҳим фигура бўлиб қолмоқда ва Сан Сиродаги фаолиятини совринлар билан якунлашни мақсад қилган. Бу ҳақда Goal.com хабар беради.
2025-йилнинг ёзида Реал Мадрид билан хайрлашиб, эркин агент сифатида Милан сафига қўшилган Модриć ҳамон юқори даражада рақобатбардош эканини исботламоқда. Унинг шартномаси мавсум охирида тугайди, бироқ уни яна бир йилга узайтириш банди мавжуд. Келажаги ҳақидаги саволларга жавоб берар экан, футболчи ҳозирча бор эътиборини Чемпионлар лигаси йўлланмасини қўлга киритишга қаратганини таъкидлади.
"Миланда жуда бахтлиман, лекин ҳозир энг муҳими — якшанба кунги Каляри билан ўйин ва Чемпионлар лигасига чиқиш. Қолганини вақт кўрсатади. Клуб раҳбарияти ва мураббий билан муносабатларим аъло даражада", — дея тушунтирди хорватиялик маестро Sportмедиасет нашрига берган интервюсида.
Ўзининг ёрқин фаолияти давомида Реал Мадрид билан олти бор Чемпионлар лигаси ғолиби бўлган Модриć Италияга шунчаки фаолиятини якунлаш учун келмаганини айтди. У Россонери либосида камида битта йирик соврин ютишни орзу қилмоқда. "Мен бу ерга ёрдам бериш ва ғалаба қозониш учун келганман. Бу йил соврин юта олмадик, лекин Милан билан чемпион бўлишни жуда хоҳлайман", — дея қўшимча қилди у.
Яқинда юз суяги синиши туфайли жарроҳлик амалиётини ўтаган ярим ҳимоячи майдонга махсус ҳимоя ниқобида қайтишга тайёрлигини билдирди. У ўзини жисмонан яхши ҳис қилаётганини ва Аллегри имкон берса, жамоасига ёрдам беришга тайёрлигини маълум қилди.
“Zamin”ни Telegram'да ўқинг!
