Машҳур сунъий интеллект мутахассиси Андрей Карпатҳй расман Anthropic компанияси жамоасига қўшилди. У Х ижтимоий тармоғи орқали қилган чиқишида чуқур тадқиқотлар ва ишланмалар жараёнига қайтаётганидан хурсанд эканлигини билдирди. Карпатҳйнинг фикрича, яқин йиллар йирик тил моделлари технологик фронтида саноат учун ҳал қилувчи ва энг муҳим давр бўлади. Бу ҳақда Ixbt.com хабар беради.
Андрей Карпатҳй жаҳон сунъий интеллект ҳамжамиятидаги энг нуфузли ва таниқли шахслардан бири ҳисобланади. У OpenAI стартапининг асосчиларидан бири бўлган, кейинчалик Tesla компаниясида автопилот ва ҳайдовчисиз бошқарув тизимлари бўйича ишлаб чиқиш гуруҳига раҳбарлик қилган. 2024-йилда OpenAI'ни тарк этган мутахассиснинг Anthropic'ни танлаши экспертлар томонидан OpenAI учун жиддий йўқотиш сифатида баҳоланмоқда.
Яқин вақтгача Карпатҳй таълим соҳасига сунъий интеллектни интеграция қилишга қаратилган Эурека Лабс лойиҳаси билан шуғулланаётган эди. У таълим мавзуси ўзи учун ҳамон муҳим эканлигини ва вақти келганда ушбу лойиҳага қайтишини таъкидлади. Мутахассиснинг илмий ишга қайтиш қарори унинг автоматлаштириш истиқболларига бўлган қарашлари ўзгаргани билан боғлиқ.
Карпатҳй сўнгги пайтларда дастурий код яратишга мўлжалланган «агент» тизимларининг ривожланиш суръатларидан ҳайратда қолганини тан олди. Бир неча ой олдин у бундай автоном агентларнинг имкониятларига нисбатан скептик муносабатда бўлган бўлса-да, технологиялар эволюцияси уни ўз фикрини қайта кўриб чиқишга ва янги авлод моделларини яратиш устида ишлашга ундади.
“Zamin”ни Telegram'да ўқинг!
