Токусима университети тадқиқотчилари Токио ва Гифу университетлари олимлари билан ҳамкорликда 6G мобил тармоқлари даврини яқинлаштирувчи технологик ютуққа эришдилар. Физиклар 560 ГГс ўта юқори частота диапазонида битта канал орқали 112 Гбит/с рекорд тезликда барқарор маълумот узатишни намойиш этишди. Бу илм-фан тарихида 420 ГГс дан юқори частоталарда 100 Гбит/с тезлик чегараси забт этилган илк ҳолатдир. Бу ҳақда Ixbt.com хабар беради.
Терагерц диапазони (300 ГГс дан юқори) келажакдаги 6G тармоқлари учун асосий пойдевор ҳисобланади, чунки у улкан ўтказувчанлик қобилиятига эга бўлган “ахборот магистраллари”ни яратишга имкон беради. Бироқ анъанавий кремний электроникаси 350 ГГс дан юқори частоталарда жисмоний чекловларга дуч келади: узатгичларнинг қуввати пасайиб, шовқин даражаси кескин ортади. Такеши Ясуи бошчилигидаги жамоа ушбу тўсиқни енгиб ўтиш учун электрон генераторлардан воз кечиб, радиофотоника усулидан фойдаланди.
Олимлар кремний нитридидан тайёрланган чипда ўстирилган, инсон тирноғидан ҳам кичик бўлган солитон оптик микро-тароқ (солитон микрокомб) қурилмасини қўллашди. Ушбу оптик асбоб лазер нурини частота ва фаза бўйича мукаммал созланган кўплаб чизиқларга ажратади. 16QAМ модуляциясини қўллаш орқали физиклар ёруғликни мисли кўрилмаган даражадаги тоза терагерц радиотўлқинларига айлантиришга муваффақ бўлишди.
Рекорд тезликдан ташқари, муаллифлар тизим барқарорлиги муаммосини ҳам ҳал қилишди. Аввалги лаборатория схемалари ҳарорат ўзгаришига ўта сезгир бўлиб, бир неча дақиқада ишдан чиқарди. Токусима муҳандислари оптик толани тўғридан-тўғри микрорезонатор чипига пайвандлаб, ҳароратни назорат қилиш тизимини ўрнатдилар. Натижада қурилма лабораторияда 27 соатдан ортиқ узлуксиз ва ишончли ишлади.
Смартфонларда ушбу технология пайдо бўлиши учун ҳали йиллар керак бўлади. Физиклар сигнал узатиш масофасини ошириш ва шовқинларни янада камайтириш устида ишлашлари лозим. Ушбу технологиянинг илк амалий қўлланиш соҳаси фойдаланувчилар кўзидан йироқ бўлган тармоқ инфратузилмаси — таянч станцияларини ўзаро боғловчи магистрал алоқа каналлари (бакхаул) бўлиши кутилмоқда.
“Zamin”ни Telegram'да ўқинг!
