Elon Musk асос солган SpaceX компанияси акцияларни бирламчи оммавий жойлаштириш (ИПО) учун АҚШ Қимматли қоғозлар ва биржалар комиссиясига расмий ҳужжатларни тақдим этди. Таҳлилчиларнинг прогнозларига кўра, компания тахминан 1,75 триллион долларга баҳоланиши мумкин. Бу SpaceX'ни дунёдаги энг қиммат оммавий корпорациялардан бирига ва Tesla'дан кейин Муск империясидаги иккинчи триллион долларлик активга айлантиради. Бу ҳақда Ixbt.com хабар беради.
Дастлабки маълумотларга кўра, йирик инвесторлар учун тақдимотлар 4-июндан бошланади, акцияларнинг биржадаги савдолари эса 11–12-июн кунларига режалаштирилган. Қимматли қоғозлар Насдақ биржасида СПКХ тикери остида жойлаштирилади. Жараёнда Уолл-стритнинг Goldman Sachs, Morgan Stanley ва JPMorgan Часе каби гигант банклари иштирок этмоқда. Муҳим жиҳати шундаки, икки тоифали акциялар тизими туфайли Elon Musk компания устидан 85 фоизлик назоратни ўзида сақлаб қолади.
Ҳужжатлар SpaceX шунчаки ракета ишлаб чиқарувчи эмас, балки Starlink сунъий йўлдош интернети орқали улкан даромад кўраётган технологик гигантга айланганини кўрсатмоқда. Ҳозирда орбитада 10 мингга яқин сунъий йўлдош мавжуд бўлиб, компаниянинг 2025-йилдаги даромади 18,7 миллиард долларга етган. Шунингдек, компания 100 тераватт қувватга эга коинот маълумотлар марказларини (дата-сентер) яратиш каби амбицияли лойиҳаларни режалаштирмоқда.
SpaceX ўз хизматларини Мускнинг xAI сунъий интеллект компанияси билан интеграция қилишни мақсад қилган. Сунъий интеллект (AI) келажакдаги ўсишнинг асосий драйвери сифатида кўрилмоқда. Шу билан бирга, Starship ракетасининг янги синовлари компаниянинг узоқ муддатли қийматига бевосита таъсир қилади. Агар ушбу ИПО муваффақиятли ўтса, бу OpenAI ва Anthropic каби бошқа йирик AI стартапларининг ҳам биржага чиқишига туртки бўлиши мумкин.
“Zamin”ни Telegram'да ўқинг!
