Elon Musk томонидан 24 йил аввал асос солинган SpaceX аэрокосмик компанияси ниҳоят ўзининг ИПО (акцияларни оммавий жойлаштириш) аризасини эълон қилди. Компания биржага чиққанидан сўнг ҳам Муск унинг марказида бош директор (CEO), техник директор (CTO) ва директорлар кенгаши раиси сифатида қолади. Чоршанба куни бозорлар ёпилгандан кейин эълон қилинган ҳужжатлар SpaceX шунчаки қайта фойдаланиладиган ракеталар ишлаб чиқарувчиси эмас, балки сунъий интеллект ва сунъий йўлдошлар билан шуғулланувчи йирик технологик конгломератга айланганини кўрсатмоқда. Бу ҳақда Techcrunch.com хабар беради.
Компания жорий йил охирида Насдақ биржасида “СПКХ” тикери остида савдога чиқиши кутилмоқда. Бу тарихдаги энг йирик ИПО бўлиши прогноз қилинмоқда: компания 75 миллиард доллар маблағ жалб қилишни кўзлаган, унинг умумий қиймати эса 1,75 триллион долларга баҳоланиши мумкин. Ҳозирда дунёнинг энг қиммат оммавий компанияси мақомини 5,4 триллион долларлик бозор капиталлашуви билан NVIDIA эгаллаб турибди.
С-1 шаклидаги ҳисобот SpaceX бизнесининг молиявий ҳолатини ҳам очиқлади. 2025-йилда компания 18 миллиард доллардан ортиқ даромад кўрган бўлса-да, 4,9 миллиард доллар зарар кўрган. Даромаднинг ярмидан кўпроғини (тахминан 11 миллиард доллар) Starlink сунъий йўлдош интернети таъминлаган. Шунингдек, Elon Musk томонидан асос солинган ва яқинда SpaceX таркибига қўшилган xAI компанияси ҳам катта харажатлар талаб қилмоқда. 2025-йилда SpaceX ўз капитал харажатларининг 60 фоизини (тахминан 20 миллиард доллар) айнан сунъий интеллект бўлимига йўналтирган.
SpaceX ўз келажагини Starship оғир ракетасининг муваффақиятига боғламоқда. Компания ушбу ракета ёрдамида 2026-йилнинг иккинчи ярмидан бошлаб орбитага юк етказиб беришни ва Starlink сунъий йўлдошларини учиришни режалаштирган. Шунингдек, аризада инсоният тарихидаги энг йирик бозор имконияти — 28,5 триллион долларлик потенциал ҳақида сўз боради, шундан 22,7 триллион доллари айнан сунъий интеллектнинг корпоратив иловаларига тўғри келиши таъкидланган.
“Zamin”ни Telegram'да ўқинг!
