Samsung смартфонлари энди қизиб кетмайди: Компания суюқлик билан совутиш тизимини жорий этмоқда
Samsung компанияси келажакдаги Galaxy смартфонларига тўлақонли суюқлик билан совутиш тизимини жорий этиш имкониятларини ўрганмоқда. Ушбу тизим герметик контур ичида айланадиган махсус суюқликдан фойдаланади ва процессордан иссиқликни анча самаралироқ четлаштиради. Бу қурилмаларга қизиб кетмасдан ва частоталарни пасайтирмасдан (троттлинг), узоқ вақт давомида максимал унумдорликда ишлаш имконини беради. Бу ҳақда Ixbt.com хабар беради.
Корея манбаларининг хабар беришича, Samsung ишлаб чиқариш-технологик институтида смартфонлар учун шундай ечимларни ишлаб чиқиш билан шуғулланувчи алоҳида жамоа шакллантирилган. Компания классик вентиляторли тизимларни кўриб чиқмаяпти, чунки улар қурилма ҳажмини оширади, шовқин чиқаради ва конструкцияни мураккаблаштиради. Бунинг ўрнига муҳандислар ингичка мобил қурилмалар учун мослаштирилган ихчам суюқлик тизимига эътибор қаратишмоқда.
Бундай технологияларга қизиқиш замонавий мобил процессорлар қувватининг ортиши ва бевосита смартфонда бажариладиган сунъий интеллект (AI) функцияларининг кенг тарқалиши билан боғлиқ. Аппарат платформасига юклама қанчалик юқори бўлса, қулай ҳарорат ва барқарор унумдорликни сақлаб қолиш шунчалик қийинлашади.
Samsung бир неча йилдан буён ўз флагманларида буғланиш камераларини (вапор чамбер) катталаштириш ва янги термоинтерфейслар орқали совутишни яхшилаб келмоқда. Бироқ компания ичидаги мутахассислар пассив совутиш имкониятлари аста-секин етарсиз бўлиб қолаётганини таъкидлашмоқда. Шу сабабли, келажакдаги Galaxy смартфонлари илк фаол суюқлик билан совутиш тизимларига эга бўлиши кутилмоқда.
“Zamin”ни Telegram'да ўқинг!
