Dunyodagi eng qimmat Lamborghini avtomobili qanchaga sotildi?

^{Foto: alexzanderjr20}
2013 yilda yagona nusxada chiqarilgan noyob Lamborghini Egoista superkari rekord darajadagi 117 million dollarga sotildi. Supercarblondie xabariga koʻra, bu kelishuv uni dunyodagi eng qimmat avtomobilga aylantirib, avvalgi rekordchi — 70 million dollarga sotilgan Ferrari 250 GTO avtomobilini ortda qoldirdi.

Lamborghini Egoista superkari gʻayrioddiy dizayni tufayli quruqlikdagi qiruvchi samolyotga oʻxshaydi. Haydovchi oʻrindigʻiga oʻtirish uchun rulni olib turishga toʻgʻri keladi. Mashina 600 ot kuchiga ega qudratli V10 dvigateli bilan jihozlangan va Lamborghini Gallardo shassisiga oʻrnatilgan.

Yaqin vaqtgacha Lamborghini Egoista kompaniya muzeyida saqlanardi va u erda abadiy qolishi kutilayotgandi. Biroq, aftidan, kompaniya «juda foydali» taklifga qarshilik koʻrsata olmadi. Insayderlarga koʻra, superkar noma'lum joyga olib ketilgan.

Egoista dizayni Uolter da Silva rahbarligida ishlab chiqilgan boʻlib, u reaktiv qiruvchi samolyotning quruqlikdagi timsolini yaratishni maqsad qilgan. Xususiyatlari orasida gʻayrioddiy uch boʻlakli old dizayn va shisha «soyabon» bilan qoplangan bir oʻrindiqli kabina mavjud.

Harbiy samolyotlarga oʻxshashlikni oshirish uchun Egoista korpusi radarga qarshi qoplama va faol aerodinamik elementlar bilan jihozlangan. Oʻzining ekstravagant koʻrinishiga qaramay, superkar seriyali Gallardo shassisiga oʻrnatilgan. “Zamin” yangiliklarini “Telegram”da kuzatib boring