18:28 / 17.11.2022

Ukrainadagi urushning 266-kuni: Xersonda topilgan qiynoq kamerasi, Chornobayivkada istilo izlari (foto)

Ukraina qurolli kuchlari Rossiyaning 15 noyabr kungi hujumlari vaqtida ukrain shaharlari bo‘ylab yuzga yaqin raketa uchirilganini ma’lum qilishdi. Ukraina energetika vaziri German Galushchenko buni «urush boshidan buyon energetika infratuzilmalariga qilingan eng keng ko‘lamli hujum» deb atadi.

Ukraina harbiylari AQSH va ittifoqchilarga 15 noyabr kuni Polshada raketa qulagan joyga yaqin hududda rossiyaliklar raketasini to‘sishga uringani haqida ma’lumot berishgan.

AQSH yakuniy xulosa qanday bo‘lmasin, Polsha hududiga raketa qulashi uchun Rossiyani javobgar deb bilishini ma’lum qildi. RF TIV rossiyalik harbiylar ushbu hodisaga aloqadorligini butkul rad etmoqda. Ukraina xavfsizlik xizmati Xersonda rus harbiylari tomonidan shaharni okkupatsiya qilish vaqtida foydalanilgan «qiynoq kameralari» topilganini da’vo qilmoqda.

«Rus sidyashaya» inson huquqlari loyihasi asoschisi Olga Romanova xabar berishicha, «Vagner» guruhi a’zolari kamida 40 nafar urush qatnashchisini sudsiz qatl qilgan.

Quyida 16 noyabr, urushning 266-kunida Ukrainaning turli hududlarida olingan suratlar.

Rossiyaliklarning Chornobayivkada tashlab ketilgan pozitsiyasi

^{Chornobayivka aeroporti hududida qolgan RF armiyasining yakson etilgan harbiy texnikasi. Chornobayivka — rossiyalik harbiylar tashlab chiqqan Xersondan 11 kilometr g‘arbda joylashgan. Chornobayivkada aeroport borligi tufayli, qishloq RF armiyasi uchun strategik ahamiyatga ega bo‘lgan. 24 fevral kuniyoq Rossiya aeroport bo‘ylab zarbalar bergan, uch kun o‘tib uni egallab olgan. Shundan keyin Ukraina qurolli kuchlari muntazam ravishda aeroportni o‘qqa tutishdi — prezident ofisi maslahatchisi Aleksey Arestovich ma’lumotiga ko‘ra, 10 iyulgacha ukrain qo‘shini bu hududga 26 bor hujum uyushtirgan. 11 noyabr kuni Ukraina qurolli kuchlari Chornobayivkani ozod etishdi, 14 noyabr kuni Ukraina qishloq Rossiya tomonidan o‘qqa tutilganini ma’lum qildi. Foto: Valentyn Ogirenko / Reuters / Scanpix / LETA}

^{Rossiya harbiylarining Chornobayivka aerodromida qoldirib ketgan harbiy texnikasi. Ukraina armiyasi Rossiyaning Chornobayivkadagi pozitsiyasiga muntazam ravishda va muvaffaqiyatli zarbalar bergan — bu haqda internetda memlar ham paydo bo‘lgandi.
Valentyn Ogirenko / Reuters / Scanpix / LETA}

^{Rossiya harbiylarining Chornobayivka aerodromida vayron qilingan pozitsiyasi
Valentyn Ogirenko / Reuters / Scanpix / LETA}

^{Rossiyalik askarlar o‘g‘irlagan muzlatkichlar aeroport hududida
Valentyn Ogirenko / Reuters / Scanpix / LETA}

^{Ukrain harbiylari aerodrom hududida topgan inson skeleti
Valentyn Ogirenko / Reuters / Scanpix / LETA}

^{RF armiya tomonidan foydalanilgan artilleriya snaryadlari
Valentyn Ogirenko / Reuters / Scanpix / LETA}
Xersondagi gumanitar vaziyat

^{11 noyabr kuni ozod etilgan Xerson aholisi shahar bosh maydonida gumanitar yordam tarqatilishini kutmoqda. Xersonda suv quvuri va daryoning o‘ng sohilini ta’minlab kelgan yirik elektr stansiya vayron qilingan, shu tufayli shaharda elektr va ichimlik suvi, shuningdek aloqa bilan bog‘liq muammolar kuzatilmoqda. Foto: Oleg Petrasyuk / EPA / Scanpix / LETA}

^{Yegulik uchun navbatda turgan xersonliklar
Valentyn Ogirenko / Reuters / Scanpix / LETA}

^{Shahar aholisi Dneprdan suv olmoqda
Oleg Petrasyuk / EPA / Scanpix / LETA}

^{Xerson aholisi shahar markaziy maydonida selfi qilmoqda
Chris McGrath / Getty Images}

^{Suv uchun navbatda turgan xersonliklar
Paula Bronstein / Getty Images}

^{Xersonlik keksa yoshli ayol o‘z uyida sham yoqmoqda
Paula Bronstein / Getty Images}
Xersondagi qiynoqlar qo‘llangan qamoqxona

^{Ukraina xavfsizlik xizmati 16 noyabr kuni Xersonda rossiyalik harbiylar foydalangan izolatorda «qiynoq kamera»si topilgani haqida xabar berdi. «Xersonliklar so‘roq qilingan va shafqatsizlarcha qiynoqqa solingan. Qiynoq kameralarini ko‘zdan kechirish chog‘ida huquq-tartibot organlari xodimlari qiynoq izlaridan darak beruvchi buyumlarni topishdi», deyiladi idora xabarida. Foto: Chris McGrath / Getty Images}

^{Operator Ukraina tomoni talqiniga ko‘ra, rossiyalik harbiylar Xerson aholisi vakillarini qiynoqlarga solgan qamoqxonani tasvirga olmoqda. Devorda «Slava Rossii!!! Slava Putinu!!! Slava Shoygu!!!» yozuvi
Murad Sezer / Reuters / Scanpix / LETA}