Rossiyada o‘zbekistonlik restoran ichida "granata" hazili bilan qo‘lga olindi

Rossiyaning Sankt-Peterburg shahridagi "Pali" restoranida 47 yoshli o‘zbekistonlik erkak o‘zida granata borligini aytib, hazil qildi.

Hodisa 20-fevral kuni yuz berdi. Erkak restoranga kirib, yonida granata borligini e’lon qildi. Tezkor ravishda voqea joyiga yetib kelgan huquq-tartibot organlari uni qo‘lga oldi. O‘tkazilgan tintuv natijasida hech qanday portlovchi qurilma topilmadi.

Shundan so‘ng, ushbu shaxs harbiy komendantura xodimlariga topshirildi. Hozirda huquq-tartibot idoralari unga nisbatan jinoiy ish qo‘zg‘atish masalasini ko‘rib chiqmoqda.