Erondagi harbiy tizimga tegishli muhim shaxslardan biri halok bo‘lgani haqida ma’lumotlar tarqaldi. Xabarlarga ko‘ra, Eronning “Basij” kuchlari qo‘mondoni G‘ulom Rizo Sulaymoniy Isroil harbiy-havo kuchlari tomonidan Tehronga amalga oshirilgan zarba natijasida vafot etgan.
Bu haqda Isroil Mudofaa kuchlari rasman ma’lum qilgan. Manbaga ko‘ra, zarba aniq nishonga qaratilgan bo‘lib, unda yuqori lavozimli harbiy shaxs yo‘q qilingan. Biroq hozircha Eron tomoni ushbu xabarni rasman tasdiqlagani yoki rad etgani yo‘q.
Tahlilchilar fikricha, “Basij” qo‘mondonining halok bo‘lishi Eron uchun jiddiy zarba bo‘lishi mumkin. Chunki ushbu tuzilma mamlakat ichki xavfsizligi va safarbarlik tizimida muhim o‘rin tutadi.
Ayni paytda mazkur voqea Yaqin Sharqdagi vaziyatni yanada keskinlashtirishi mumkinligi aytilmoqda. Mutaxassislar bu kabi nishonli zarbalar ikki davlat o‘rtasidagi qarama-qarshilikni yangi bosqichga olib chiqishi ehtimolini ham istisno qilmayapti.
Hozircha hodisaning barcha tafsilotlari ochiqlanmagan bo‘lsa-da, rasmiy bayonotlar va qo‘shimcha ma’lumotlar kutilmoqda.
“Zamin”ni Telegramʻda oʻqing!
