Inson organizmida muhim rol o‘ynaydigan pigmentlardan biri — melanin hisoblanadi. Uning asosiy vazifasi teri, soch va ko‘zlarni tashqi ta’sirlardan muhofaza qilishdir. Ayniqsa, melanin quyoshdan keladigan ultrabinafsha nurlarni yutib, ularning xavfli ta’sirini kamaytiradi.
Teridagi melaninning asosiy vazifasi — ultrabinafsha nurlarni yutib, ularning DNKga zarar yetkazishining oldini olishdir. Chunki quyosh nurining ortiqcha ta’siri terida kuyish jarayonini keltirib chiqaradi, qarish jarayonini tezlashtiradi va hatto teri saratoni xavfini kuchaytiradi.
Melanin bu xavflarni keskin kamaytiradi. Shuning uchun teri rangi to‘qroq bo‘lgan odamlar quyosh ta’siriga nisbatan yaxshiroq himoyalangan bo‘ladi. Oq tanli insonlar esa tezroq kuyishi va ularda teri saratoni xavfi yuqori bo‘lishi mumkin.
Shu bilan birga, melanin insonning tashqi ko‘rinishiga ham ta’sir ko‘rsatadi. U teri rangi va umumiy koloritni belgilab, insonning individual qiyofasini shakllantiradi.
