O‘zbekistonda 2025 yilning yanvar-iyul oylari davomida gaz eksporti va importi bo‘yicha yangi raqamlar e’lon qilindi. Milliy statistika qo‘mitasi ma’lumotlariga ko‘ra, mamlakat gaz importi hajmi eksport ko‘rsatkichidan oshib ketdi, deb yozadi Spot.
Dastlabki yetti oylik hisobotga ko‘ra, Turkmaniston va Rossiyadan gaz importi 30,6 foizga qisqargan bo‘lsa-da, umumiy qiymati 734 mln dollarga yetdi. Jumladan, yanvar oyida gaz yetkazib berish 27,8 mln dollar, fevralda 8 mln dollar, martda esa 2,7 mln dollarni tashkil etdi. Keyinchalik, aprel oyida gaz importi keskin ko‘tarilib 112 mln dollar, may oyida 135 mln dollar, iyun oyida esa rekord darajada — 286,3 mln dollarga yetdi. Iyulda esa import hajmi qisqarib, 162,2 mln dollarni tashkil qildi.
Shu bilan birga, yil boshidan Xitoyga gaz eksportida o‘sish qayd etildi. Milliy statistika qo‘mitasiga ko‘ra, yetkazib berish hajmi 38,2 foizga ko‘payib, 438,6 mln dollarga yetgan. Xususan, yanvar oyida Xitoyga 21,8 mln dollar, fevralda 20,2 mln dollar, martda 52,3 mln dollar, aprelda 105,4 mln dollar, mayda 88,3 mln dollar, iyunda 66,9 mln dollar, iyulda esa 83,7 mln dollarlik gaz yetkazib berilgan.
Biroq, bu raqamlar Xitoy Bojxona bosh boshqarmasi ma’lumotlaridan farq qiladi. Xitoy tomonining hisob-kitobiga ko‘ra, O‘zbekiston yanvar-may oylarida 460 mln dollarlik gaz eksport qilgan va bu o‘tgan yilga nisbatan 51,2 foizga ko‘pdir. Shuningdek, Xitoy tomoni iyundan iyulgacha bo‘lgan davrda O‘zbekistondan gaz olib kelish hajmi 8,95 foizga kamayganini qayd etdi.
Jahon bozorida esa Xitoyga gaz yetkazib berishda yetakchilik hanuz Rossiya qo‘lida. 2025 yilning dastlabki yetti oyida Rossiya Xitoyga 5,69 mlrd dollarlik gaz yetkazib bergan. Ikkinchi o‘rinda Turkmaniston (4,95 mlrd dollar), keyingi o‘rinlarda esa Myanma (922,1 mln dollar), Qozog‘iston (599,5 mln dollar) hamda nisbatan kichik hajmda AQSH va Italiya qayd etilgan.
Mutasaddilarning ta’kidlashicha, import va eksportdagi ushbu dinamika O‘zbekistonning ichki iste’mol hajmi ortib borayotganini va tashqi bozorlardagi raqobatni yanada kuchaytirayotganini ko‘rsatmoqda.
