O'zbekistonda uy-joy savdosi mart oyida 47 foizga oshdi

Iqtisodiy tadqiqotlar va islohotlar markazi 2026 yil mart oyi yakunlari bo'yicha O'zbekiston ko'chmas mulk bozori sharhini e'lon qildi. Ma'lumotlarga ko'ra, mamlakatda uy-joy savdosi keskin sur'atlar bilan o'sib, ro'yxatga olingan bitimlar soni 43,6 mingtani tashkil etdi. Bu ko'rsatkich fevral oyiga nisbatan 47 foizga, o'tgan yilning mos davriga nisbatan esa ikki baravardan ko'proqqa ko'pdir. Bu haqda Uzdaily.uz xabar beradi.

Mutaxassislar ushbu o'sishni aprel oyidan kuchga kirgan eskrou-hisobvaraqlar orqali hisob-kitob qilish tizimiga o'tilishi bilan bog'lamoqda. Yangi mexanizm joriy etilishi arafasida xaridorlar va sotuvchilar bitimlarni tezlashtirishga harakat qilgan. Hududlar kesimida eng yuqori o'sish sur'atlari Jizzax (73,2 foiz), Sirdaryo (64,6 foiz) va Namangan (63 foiz) viloyatlarida qayd etildi. Toshkent shahrida esa savdo hajmi 44 foizga oshib, 12,8 mingta bitimni tashkil qildi.

Ikkilamchi bozorda narxlar barqaror o'sishda davom etmoqda. Respublika bo'yicha bir oyda narxlar 0,4 foizga, yil davomida esa 10 foizga ko'tarildi. Sirdaryo va Samarqand viloyatlarida narxlar o'sishi mos ravishda 22 va 18,7 foiz bilan eng yuqori bo'ldi. Poytaxtning ikkilamchi bozorida yillik o'sish 5 foizni tashkil etib, Mirobod, Mirzo Ulug'bek va Chilonzor tumanlarida narxlar balandligicha qolmoqda.

Ijara bozori ham faollashgan. Toshkent shahrida ijara narxi bir oyda 2,7 foizga oshib, har bir kvadrat metr uchun o'rtacha 8,9 dollarga yetdi. Markaziy tumanlarda ijara stavkalari 11 dollargacha ko'tarilgan. Yangi qurilgan uylar segmentida esa o'rtacha narx o'tgan yilga nisbatan 8,8 foizga oshgani kuzatildi.