Ether gʻaznasiga egalik qiluvchi Bitmine Immersion Technologies kompaniyasi Russell 3000 indeksiga kiritilishi mumkin boʻlgan nomzodlarning dastlabki roʻyxatidan joy oldi. Kompaniya raisi Tom Lee ushbu qadam aksiyalar narxi uchun kuchli turtki boʻlishiga ishora qildi. London Stock Exchange Group shoʻba korxonasi boʻlgan FTSE Russell juma kuni AQSHning 3000 ta eng yirik kompaniyasini kuzatuvchi indeksning yangilangan roʻyxatini eʼlon qildi. Bu haqda Cointelegraph.com xabar beradi.
Tom Lee oʻzining X ijtimoiy tarmogʻidagi sahifasida Bitmine bozor kapitallashuvi 10,15 milliard dollarni tashkil etgani sababli, hatto Russell 1000 indeksiga ham kirishi mumkinligini taʼkidladi. Uning soʻzlariga koʻra, koʻplab faol menejerlar faqat ushbu indeksdagi aksiyalarni sotib olishadi. Shuningdek, indeksga kiritilgan kompaniya aksiyalarining 25 foizigacha boʻlgan qismi passiv indeks fondlari yoki ETFlar tomonidan sotib olinishi taxmin qilinmoqda.
Bitmine kompaniyasining Russell 1000 indeksiga kirishi uni NVIDIA, Microsoft va Apple kabi texnologik gigantlar bilan bir qatorga qoʻyadi. Bu holat passiv fondlar tomonidan avtomatik xaridlarni amalga oshirishga sabab boʻladi va anʼanaviy investorlarga kompaniyaning Ether zaxiralari orqali kripto bozoriga bilvosita kirish imkonini beradi. FTSE Russell roʻyxatni iyun oyi davomida yangilab boradi va yakuniy oʻzgarishlar 26-iyun kuni kuchga kiradi.
Hozirgi vaqtda Bitmine 5,28 million dona Ether tokeniga egalik qiladi, bu Ethereum umumiy taʼminotining taxminan 4,37 foizini tashkil etadi. Kompaniyaning yakuniy maqsadi ushbu koʻrsatkichni 5 foizga yetkazishdir. Garchi Ether narxi oʻzining eng yuqori choʻqqisidan 57 foizga tushgan boʻlsa-da, Tom Lee bu pasayishni yangi xaridlar uchun qulay imkoniyat deb hisoblamoqda.
Maʼlumotlarga koʻra, Bitmine oʻzining kripto zaxiralarining katta qismini steykingga joylashtirgan boʻlib, bu kompaniyaga yiliga 289 million dollar daromad keltirmoqda. Bitmine Immersion Technologies (BMNR) aksiyalari juma kungi savdolarni 18,88 dollar darajasida yakunlagan boʻlsa-da, yirik indekslarga qoʻshilish haqidagi xabarlar investorlar ishonchini oshirishi kutilmoqda.
“Zamin”ni Telegramʻda oʻqing!
