Elektron to‘lovlar sohasida katta o‘zgarishlar kutilmoqda: muhim uchrashuv bo‘lib o‘tdi

Strategik islohotlar agentligida elektron to‘lovlar ulushini ko‘paytirish bo‘yicha kompleks chora-tadbirlarni tayyorlash doirasida moliyaviy sektor vakillari bilan navbatdagi muloqot bo‘lib o‘tdi. Bu haqda agentlik matbuot xizmati xabar berdi.

Ushbu uchrashuvda mamlakatdagi yirik to‘lov tashkilotlari — Click asoschisi va bosh direktori Ulug‘bek Rustamov, OSON yuridik direktori Dilshod Keldiyarov va Paynet bosh direktori Anvar Isamuhamedov qatnashdi.

Muzokara davomida elektron to‘lov tizimlarining boshqa turdagi hisob-kitoblarga nisbatan ustunligini ta’minlovchi omillar, shuningdek, elektron to‘lovlar qabul qilinishi shart bo‘lgan sohalar ro‘yxatini kengaytirish muhimligi muhokama qilindi.

To‘lov tashkilotlari rahbarlari avtoturargohlar va bozorlarda patent to‘lovlarini yig‘ish kabi sohalarda hali ham naqd pul ustunligini ta’kidladi. Ushbu yo‘nalishlarni ham elektron to‘lovlar qabul qilinadigan majburiy sohalar ro‘yxatiga qo‘shish taklifi bildirildi.

Shuningdek, temiryo‘l chiptalari, kommunal xizmatlar uchun to‘lovlar va marketpleys orqali xaridlarni to‘liq naqdsiz tizimga o‘tkazish masalasi ko‘tarildi.

Ma’lum qilinishicha, Strategik islohotlar agentligi tomonidan elektron to‘lovlar sonini oshirish, qulay va zamonaviy to‘lov infratuzilmasini yaratish maqsadida prezident qarori loyihasi tayyorlanmoqda. Bu maqsadda agentlik biznes, IT-mutaxassislar va ekspertlar bilan muntazam ravishda fikr almashmoqda. “Zamin”ni Telegramʻda oʻqing!