Qamchiq dovonida xavfli hodisa: “Volga” soyga tushib ketdi
26-aprel kuni Qamchiq dovonida "Volga" rusumli avtomobil haydovchisi boshqaruvni yo‘qotishi oqibatida transport vositasi yo‘l chetidagi soyga tushib ketdi. Voqea joyiga yetib kelgan qutqaruvchilar mashina ichidagi ikki nafar fuqaroni olib chiqib, ularga birinchi tibbiy yordam ko‘rsatgan holda shifokorlarga topshirishdi. Maxsus texnika yordamida avtomobil ham xavfsiz hududga chiqarib olindi. Hozirda mazkur holat yuzasidan tegishli o‘rganish ishlari olib borilmoqda.
“Qamchiq” dovonida yoʻl-transport hodisasi sodir boʻlib, yengil avtomobil soyga tushib ketdi. Bu haqda Favqulodda vaziyatlar vazirligi maʼlum qildi.
Maʼlum qilinishicha, 26 aprel kuni A-373 avtomobil yoʻlining dovon qismida “Vodiy–Toshkent” yoʻnalishida harakatlanayotgan “Volga” rusumli mashina haydovchisi rul boshqaruvini yoʻqotgan. Oqibatda transport vositasi yoʻl chetidan chiqib ketib, pastda joylashgan soyga qulab tushgan.
Hodisa yuzasidan “112” yagona qoʻngʻiroq tizimi orqali “Qamchiq” maxsus qutqaruv boʻlimiga xabar berilgan. Qisqa vaqt ichida qutqaruvchilar hodisa joyiga yetib borgan.
Qutqaruv amaliyoti davomida avtomobil ichida boʻlgan ikki nafar fuqaro olib chiqilib, ularga birinchi tibbiy yordam koʻrsatilgan. Keyinchalik jabrlanganlar tez tibbiy yordam xodimlariga topshirilgan.
Shuningdek, maxsus texnika yordamida soyga tushib ketgan avtomobil ham xavfsiz hududga chiqarilgan. Hozirda holat yuzasidan tegishli tartibda oʻrganish ishlari olib borilmoqda.
Izohlar 0
…