Samarqandda «Bir million dasturchi» loyihasida 1-o‘rinni olgan o‘quvchiga ishlatilgan noutbuk sovg‘a qilingan

Ijtimoiy tarmoqlarda Samarqand viloyatining Nurobod tumanida yashovchi o‘quvchi «Bir million dasturchi» loyihasida birinchi o‘rin olgani va unga ishlatilgan noutbuk sovg‘a qilingani aytilgan murojaat tarqaldi.

Ma’lum qilinishicha, tumanning 41-umumta’lim maktabining 8-sinf o‘quvchisi Sardor Sattorov «Bir million o‘zbek dasturchilari» loyihasining viloyat bosqichida 1-o‘rinni olishiga qaramay unga 3-darajali diplom hamda ishlatilgan (eski) noutbuk sovg‘a qilingan.

«Bu nomardlar eskini berguncha bitta kitob bilan diplom bersa bo‘lmasmidi? Changini ham artmagan buni, kim biladi necha yildan beri chang bosib yotgan. Shunchalik ham nomardlik bo‘ladimi?...», — deydi o‘quvchining bobosi.

Samarqand viloyati hokimligining ma’lum qilishicha, mazkur holat yuzasidan viloyat hokimligi ishchi guruhi tuzilib, dastlabki o‘rganish ishlari olib borilmoqda. O‘rganish natijalari bo‘yicha qo‘shimcha ma’lumotlar beriladi.

Ma’lumot uchun, 2019 yilning 21 noyabrida O‘zbekistonda dasturchilarni bepul tayyorlovchi One Million Uzbek Coders loyihasi ishga tushirilgandi. Loyiha birinchi navbatda mahalliy aholiga, asosan, yoshlarga axborot texnologiyalari mutaxassisliklarida arzon va sifatli ta’lim olish imkoniyatini beradi. Loyiha Birlashgan Arab Amirliklari hukumati, O‘zbekiston Axborot texnologiyalari va kommunikatsiyalarini rivojlantirish vazirligi, Toshkent shahridagi Inha universiteti va IT-Park qoshidagi IT-akademiya ko‘magida amalga oshirilmoqda.

Eslatib o‘tamiz, Prezidenti Shavkat Mirziyoyev 2020 yilning 11 may kuni raqamli iqtisodiyot va elektron hukumatni keng joriy etish masalalari bo‘yicha o‘tkazgan yig‘ilishda kelgusi o‘quv yilida «Bir million dasturchi» loyihasiga 47 ming nafar o‘quvchini qamrab olish haqida so‘z borgandi. Keyinroq o‘quvchisi «Bir million dasturchi» kursini muvaffaqiyatli yakunlagan maktab o‘qituvchilarini mukofotlash yo‘lga qo‘yilishi aytilgandi. “Zamin” yangiliklarini “Instagram”da kuzatib boring