Yulduz Usmonova: «U dunyoga nima olib ketishim haqida ko‘p o‘ylaydigan bo‘ldim» (video)

O‘zbekiston xalq artisti Yulduz Usmonova ijod bilan bir qatorda o‘zining hayotiy qarashlari va ichki kechinmalari haqida ham muxlislari bilan samimiy suhbatlashdi. Hozirgi kunda san’atkor o‘zining ma’naviy hayotiga yanada ko‘proq e’tibor qaratganini, bu dunyodagi mavjudligi va u dunyoga olib ketadigan narsalari haqida ko‘p o‘ylayotganini ochiq-oydin ma’lum qildi.

«Hozir ijod qilib, qo‘shiq kuylayotganimga qaramang. Ibodatlarimga yanada ko‘proq ahamiyat qaratishga harakat qilyapman. Endi ko‘proq u dunyo uchun nima tayyorlaganimni, u yerga nima olib ketishim haqida o‘ylaydigan bo‘ldim», – deydi Yulduz Usmonova.

San’atkor o‘z farzandlari kelajagi haqida ham qattiq tashvishlanayotganini aytib, ularning mustaqil va mustahkam bo‘lishini xohlashini ta’kidladi.

«Bolalarim meni yo‘qligimda qiynalmasin, mustahkam bo‘lib, o‘z oyoqlarida tursin, deyman. Pul yoki moddiy yordam bilan emas, balki yaxshi tarbiya va sifatli ta’lim bilan ularga yordam berishni xohlayapman. Farzandlarim aqlli, bilimli bo‘lib, o‘z hayotlarini mustaqil qurishsin. Mana shuni ko‘proq o‘ylab qoldim», – deb ta’kidladi xonanda.

Ushbu fikrlari orqali Yulduz Usmonova nafaqat ijodkor sifatida, balki ona sifatida ham o‘zining hayotiy maqsadlari va kelajak haqidagi tashvishlarini samimiylik bilan bo‘lishdi. Muxlislari ham xonandaning bu so‘zlarini ehtirom va qadrlash bilan qabul qilishmoqda.

Yulduz Usmonovaning bu ichki kechinmalari uning ijodi bilan bir qatorda hayotiy falsafasining bir bo‘lagiga aylangani shubhasiz. Bunday samimiy munosabat san’atkorning muxlislar qalbidagi o‘rnini yanada mustahkamlaydi. “Zamin”ni Telegramʻda oʻqing!