Pop musiqa dunyosida afsonaviy nomi bilan hanuz yashab kelayotgan Maykl Jekson bilan bog‘liq har bir buyum muxlislar uchun qimmatli xazina hisoblanadi. Shuning yorqin misollaridan biri sifatida yaqinda o‘tgan auksionda qirolning sahnada kiygan yaltiroq paypog‘i 8 ming dollardan ortiq narxda sotildi. Bu haqda PeopleTalk nashri ma’lum qildi.
Gap ketayapti 1997 yildagi “History World Tour” – “Tarixiy Jahon Gastroli” doirasidagi Fransiyaning Nim shahrida bo‘lib o‘tgan konsert haqida. Jekson o‘ziga xos sahna uslubiga sodiq qolgan holda, mashhur “Billie Jean” qo‘shig‘ini ijro etish paytida strazlar bilan bezatilgan oq sport paypoqlarini kiyib chiqqan. Kecha yakunlangach, garderob yaqinida yerda yotgan bu paypoqni texnik xodim ko‘rib qoladi va yillar davomida o‘zida asrab qo‘yadi.
Vaqt o‘tishi bilan kiyimda dog‘lar paydo bo‘lgan, yaltiroq strazlarining rangi sariq tusga aylangan bo‘lsa-da, u hanuz Maykl Jeksonning sahnadagi jozibasini o‘zida saqlab qolgan “kult buyum” sifatida baholanadi. Auksionda unga bo‘lgan qiziqish yuqori bo‘lib, oxir-oqibat 8 ming dollarlik kelishuv bilan sotuv amalga oshdi.
Aytish joizki, bu birinchi marta emaski, Jeksonga tegishli sahna atributlari rekord narxlarda sotilayotgani. 2009 yilda Makaodagi kazino-kurort “oy yurish” raqsida taqilgan yaltiroq qo‘lqopni 350 ming dollarga xarid qilgan edi. 2023 yilda esa, Parijda o‘tgan auksionda uning sahnaga chiqishdan oldin kiygan shlyapasi 80 ming dollardan ortiqqa sotilgan.
Bu kabi lotlar nafaqat kolletsionerlar, balki uning ijodini ardoqlagan millionlab muxlislar uchun ham bebaho ahamiyatga ega. Chunki har bir sahna buyumi ortida Maykl Jeksonning ijodiy ruhi va sahnadagi afsonaviy quvvati yashaydi.
“Zamin”ni Telegramʻda oʻqing!
