Ijtimoiy tarmoqlarda xonanda Sardor Mamadaliyevga nisbatan sud ishi ochilgani haqida xabarlar tarqaldi. Ma’lum bo‘lishicha, bu holat uning “Chotki TV” YouTube kanaliga bergan intervyusidan keyin yuzaga kelgan.
Intervyu davomida xonandadan Sherali Jo‘rayev ijrosidagi mashhur “Ko‘rmisham” qo‘shig‘ini kuylab berish so‘ralgan. Aynan shu ijrodan so‘ng videoning tegishli qismi YouTube platformasidan olib tashlangan hamda xonandaga nisbatan sud ishi qo‘zg‘atilgani aytilmoqda.
Sardor Mamadaliyev o‘zining Instagram sahifasida joylagan videoda ushbu masala faqat unga tegishli emasligini aytdi. Uning ta’kidlashicha, yana qariyb 20 nafar shaxs ham aynan shu asosda jarimaga tortilayotgan bo‘lishi mumkin. Hozircha jarima miqdori ochiqlanmagan.
Bundan tashqari, xonanda Adliya vazirligiga ketayotgan paytda avtomobilni xavfsizlik kamarini taqmasdan boshqargani ham qayd etilgan. Shu sababli IIBB xodimlari tomonidan u bilan profilaktik suhbat o‘tkazilib, tegishli tartibda ma’muriy bayonnoma rasmiylashtirilgan. Haydovchi yo‘l harakati qoidalarining 9-bandiga amal qilmagani uchun unga nisbatan choralar ko‘rilgan.
