O‘zbekistonning davlat qarzi keskin oshmoqda — 2025-yil 1-oktyabrga kelib umumiy qarz 44 milliard dollarga yetdi. Bu bir yil ichida qariyb 4,9 milliard dollarlik o‘sish degani. Qarzning YAIMdagi ulushi 32,3 foizga chiqqan, aholi jon boshiga to‘g‘ri keladigan qarz esa 1154 dollarni tashkil etmoqda.
Umumiy qarzning 36,7 milliardi — tashqi, 7,2 milliardi — ichki qarzdir. Tashqi mablag‘larning 47 foizi byudjetni qo‘llab-quvvatlashga, 16 foizi energetikaga, qolgan qismi esa qishloq xo‘jaligi, transport va uy-joy kommunal sohalariga yo‘naltirilgan.
O‘zbekistonning asosiy kreditorlari Jahon banki (8 mlrd $) va Osiyo taraqqiyot banki (7,5 mlrd $) hisoblanadi. Tashqi qarzning 63 foizi dollarda, 12 foizi so‘mda, 8 foizi yevroda shakllantirilgan.
Mutaxassislar iqtisodiyot o‘sishi va infratuzilma loyihalari sabab tashqi mablag‘larga ehtiyoj ortganini aytishmoqda. Shu bilan birga, davlat kafolatisiz olingan, lekin davlatga tegishli bank va korxonalar zimmasiga tushadigan “kvazi-davlat” qarzlari ham ko‘paymoqda.
2025-yilning birinchi yarmida O‘zbekistonning umumiy (davlat + xususiy) tashqi qarzi 72,2 milliard dollarga yetgani qayd etilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
