O‘zbekistonda bu yil muborak Qurbon hayiti 27 may kuni nishonlanishi rasman tasdiqlandi. Bu haqda 20 may kuni Prezidentning “Muborak Qurbon hayitini nishonlash to‘g‘risida”gi qarori qabul qilindi.
Qarorga muvofiq, mamlakatda tinchlik-osoyishtalik, mehr-oqibat va hamjihatlik muhitini yanada mustahkamlash maqsadida O‘zbekiston musulmonlari idorasining 2026 yilda Qurbon hayitining birinchi kuni 27 may — chorshanbaga to‘g‘ri kelishi haqidagi axboroti ma’lumot uchun qabul qilindi hamda ushbu sana bayram sifatida keng nishonlanishi belgilandi.
Shuningdek, O‘zbekiston Mehnat kodeksining 208-moddasiga asosan Qurbon hayitining birinchi kuni rasman ishlanmaydigan bayram kuni hisoblanadi.
Qayd etilishicha, Prezidentning 2025 yil 24 dekabrdagi PF–257-sonli farmoniga muvofiq, qo‘shimcha dam olish kunlari ham belgilangan.
Jumladan:
— barcha xodimlar uchun 28 may — payshanba va 29 may — juma qo‘shimcha dam olish kuni bo‘ladi;
— olti kunlik ish haftasida mehnat qiladiganlar uchun 30 may — shanba ham dam olish kuni etib belgilangan.
