O‘zbekistondagi ilk pulli avtomobil yo‘lini barpo etish ishlari Xorazmda — Urganch–Xiva yo‘nalishida start oldi. «O‘zbekiston 24» telekanali ma’lumotiga ko‘ra, qiymati 120 million dollar bo‘lgan ushbu loyiha doirasida 35 kilometrlik zamonaviy trassa, ko‘priklar va tunnellarni o‘z ichiga olgan yirik infratuzilma quriladi.
Yangi yo‘l asfalt-beton qoplama asosida, to‘rt tasmali ko‘rinishda barpo etiladi. Mutaxassislar hisobicha, trassaning o‘tkazuvchanlik imkoniyati sutkasiga 20 mingdan ortiq transport vositasigacha yetishi kutilmoqda. Ya’ni bu yo‘l “shunchaki yo‘l” emas — harakatni tezlatadigan, tirbandlikka qarshi jiddiy qadam.
Loyiha beshta lotga bo‘lingan va bir vaqtning o‘zida bir nechta quruvchi tashkilotlar jalb etilgan. Qurilish jarayoni laboratoriyalar hamda xalqaro konsultantlar nazoratida olib borilayotgani aytilmoqda. Ish maydonida mingdan ortiq texnika ishlayotgani, loyihaga minglab mutaxassislar jalb qilingani ham ta’kidlandi.
Xorazm viloyati avtomobil yo‘llari boshqarmasi boshlig‘i Dilshodbek Niyozmetovning so‘zlariga ko‘ra, yo‘l doirasida:
- 17 ta ko‘prik,
- 8 ta yo‘l o‘tkazgich,
- 1 ta tunnel,
- 5 ta maxsus o‘tish joyi,
shuningdek, kommunikatsiya tarmoqlari va muhandislik inshootlari quriladi.
Eng katta “va’da” esa vaqtda: yangi trassa foydalanishga topshirilgandan keyin Urganchdan Xivagacha yetib borish vaqti 1 soatdan 17 daqiqagacha qisqarishi kutilmoqda. Bu degani — safar qisqaradi, logistika yengillashadi, sayyohlar ham, mahalliy aholi ham yutqazmaydi.
«Yo‘l-loyiha byuro» MCHJ direktori G‘ulom Zohidov ta’kidlaganidek, yo‘l to‘rt polosadan iborat bo‘lib, boshlanish qismida, o‘rtasida va oxirida terminallar loyihalanyapti. Ikkita servis punkti zamonaviy texnologiyalar asosida, geotekstil materiallaridan foydalangan holda barpo etiladi. Xorazmga xos yer osti sizot suvlari yaqinligini inobatga olgan holda yo‘l bo‘ylab kollektorlar loyihalashtirilgan, shuningdek zamonaviy drenaj yechimlari ham ko‘zda tutilgan.
Yana bir muhim jihat: hayvonot va o‘simlik dunyosi hamda aholi xavfsizligi uchun maxsus o‘tish yo‘laklari va yo‘l o‘tkazgichlar ham rejaga kiritilgan. Ya’ni loyiha faqat tezlik emas, xavfsizlik va tabiat bilan hisoblashishni ham o‘ylayapti.
Qisqasi, Urganch–Xiva yo‘li qurilishi — Xorazm infratuzilmasida yangi bosqich. Agar rejadagidek ketsa, bu yo‘l keyin boshqa hududlar uchun ham “namuna”ga aylanishi mumkin. Tezroq bitsin — 1 soatlik yo‘lni 17 daqiqada bosib o‘tish, rostdan ham “taym-apgreyd”.
“Zamin”ni Telegramʻda oʻqing!
