Abdumalik Xaloqov “Eyndxoven kubogi”ni zabt etdi — Angliyalik raqibini yengdi

Niderlandiyaning Eyndxoven shahrida o‘tkazilayotgan nufuzli boks musobaqasi — “Eyndxoven kubogi” o‘z nihoyasiga yetmoqda. Final bosqichiga 100 foizlik natija bilan yetib kelgan o‘zbekistonlik bokschilar hal qiluvchi janglarda yuksak mahorat namoyon etmoqda.

Bugun -60 kg vazn toifasida yurtimiz sharafini himoya qilgan iqtidorli bokschi Abdumalik Xaloqov ringda angliyalik Jek Dridenga qarshi to‘qnashdi. Qat’iyatli va nazoratda olib borilgan jang yakunlariga ko‘ra, hakamlar yakdillik bilan g‘alabani o‘zbekistonlik sportchiga topshirishdi.

Shu tariqa, Abdumalik Xaloqov “Eyndxoven kubogi”da chempionlik unvonini qo‘lga kiritdi. Uning texnik ustunligi, aniq zarbalari va yopiq himoyasi nafaqat mutaxassislar, balki tomoshabinlar tomonidan ham yuqori baholandi.

O‘zbekiston delegatsiyasi muvaffaqiyatli harakatda

Qayd etish joizki, yurtimiz bokschilari mazkur musobaqada dastlabki bosqichlardan muvaffaqiyatli o‘tib, finalga to‘liq tarkibda yetib kelishgan. Bu esa milliy terma jamoaning tayyorgarligi va salohiyati yuqori darajada ekanidan dalolat beradi.

Navbatdagi jang — Asadxo‘ja Mo‘ydinxo‘jayev vs Ablayxan Jussupov

Musobaqa davomida yana bir qiziqarli to‘qnashuv kutib turibdi. Hamyurtimiz Asadxo‘ja Mo‘ydinxo‘jayev va Qozog‘iston terma jamoasining tajribali vakili Ablayxan Jussupov o‘rtasidagi bellashuv kun tartibida. Ushbu jang ham yuksak ruhda va keskin kurashga boy o‘tishi kutilmoqda.

Final bosqichidagi har bir g‘alaba nafaqat shaxsiy, balki O‘zbekiston boksi uchun katta yutuq hisoblanadi. Hamyurtimiz Abdumalik Xaloqovning g‘alabasi bunga yorqin misol bo‘ldi. Endi esa barcha diqqat Mo‘ydinxo‘jayevning hal qiluvchi jangiga qaratiladi. “Zamin”ni Telegramʻda oʻqing!