“Lokomotiv”ning sobiq prezidenti Nikolay Naumov “Benfika” bosh murabbiyi Joze Mourinyoning keyingi faoliyati uchun qaysi liga ma’qul bo‘lishi mumkinligi haqida fikr bildirdi. U bu haqdagi mulohazalarini “Yevropa-Futbol.Ru” nashriga bergan intervyusida aytdi. Bu haqda euro-football.ru xabar beradi.
Naumovning ta’kidlashicha, Mourinyoning eng yorqin davri ortda qolgan: uningcha, portugaliyalik mutaxassisga tanaffus kerak, chunki u zamonaviy futbol tendensiyalaridan biroz ortda qolgandek. Ekspert avvallari Mourinyo sirli, kutilmagan va o‘ziga xos murabbiy sifatida ko‘ringanini, hozir esa oddiyroq va “o‘rtamiyona” darajaga tushib qolganini qayd etdi.
Naumov Mourinyoga eng mos yo‘nalish sifatida Saudiya Arabistoni chempionatini tilga oldi. U yerda maoshlar yuqori, shov-shuvlarni yaxshi ko‘rishadi va tajribali, yoshi katta yulduz futbolchilar bilan ishlash imkoniyati borligini aytib, aynan shu muhit portugaliyalik murabbiyga to‘g‘ri kelishini qo‘shimcha qildi.
Mourinyo boshqaruvidagi “Benfika” Yevropa Chempionlar ligasi 1/16 finalida Madridning “Real”iga qarshi maydonga tushadi. Dastlabki uchrashuv 17 fevral kuni Portugaliyada bo‘lib o‘tadi.
“Zamin”ni Telegramʻda oʻqing!
