SpaceX rahbari Elon Musk navbatdagi Starship raketasi hozirgi modifikatsiyadan sezilarli darajada balandroq bo‘lishini ma’lum qildi. Uning so‘zlariga ko‘ra, Starship V4 hozirgi 124 metrli konfiguratsiyaga nisbatan taxminan 15–20 foizga uzunroq bo‘ladi. Bu yangi versiyaning balandligi 145–150 metrga yetishini anglatadi va uni tarixdagi eng baland kosmik apparatga aylantiradi. Bu haqda Ixbt.com xabar beradi.
O‘lchamlarning oshirilishi yuk ko‘tarish qobiliyatini va kelajakdagi missiyalar samaradorligini oshirishga qaratilgan evolyutsion rivojlanishning bir qismidir. Starship dasturi Starbase bazasida jadal rivojlanmoqda, u yerda uchinchi avlod raketalari allaqachon sinovlardan o‘tib, parvozga tayyorlanmoqda. SpaceX mutaxassislari tizimni qisman yangilash bilan cheklanmay, uni tubdan qayta ishlash ustida ishlamoqda.
Shuningdek, SpaceX o‘zining Marmac 31 dengiz barjasini modernizatsiya qildi. "You’ll Thank Me Later" nomi bilan tanilgan ushbu kema Super Heavy tezlatkichlarini Starbase ishlab chiqarish bazasi va Kanaveral burnidagi start maydonchasi o‘rtasida tashish uchun xizmat qiladi.
Yaqinda Starbase kosmodromida Starship Flight 12 missiyasi uchun "ho‘l" general repetitsiya (WDR) muvaffaqiyatli o‘tkazildi. Sinov jarayonida Booster 19 va Ship 39 baklarini yoqilg‘i bilan to‘ldirish atigi 30 daqiqa vaqt oldi. Bundan tashqari, Super Heavy raketasining 33 ta dvigateli muvaffaqiyatli tarzda o‘t oldirib ko‘rildi.
“Zamin”ni Telegramʻda oʻqing!
