Ўзбекистонда Иккинчи жаҳон уруши қатнашчилари ва уруш йилларининг тирик гувоҳлари сони йил сайин камайиб бормоқда. 2026 йил 6 май ҳолатига кўра, мамлакат бўйлаб жами 60 нафар уруш қатнашчиси ва уларга тенглаштирилган шахслар ҳаёт кечираётгани маълум қилинди.
Расмий маълумотларга кўра, ушбу рўйхатдан 14 нафар тўғридан-тўғри жанговар ҳаракатларда иштирок этган фронт фахрийлари ўрин олган. Шунингдек, 14 нафар уруш ногирони ҳам ҳозирда юртимизда истиқомат қилмоқда.
Бундан ташқари, Иккинчи жаҳон уруши йилларида Ленинград қамалининг оғир ва даҳшатли кунларини бошдан кечирган 13 нафар инсон ҳам ҳаёт. Улар тарихнинг энг машаққатли ва фожеали даврларидан бирининг тирик гувоҳлари ҳисобланади.
Рўйхатдан яна 19 нафар собиқ концлагерь маҳбуслари ҳам ўрин олган. Улар уруш йилларида оғир азоб-уқубат ва қийин синовларни бошдан кечирган инсонлар сифатида катта ҳурматга сазовор.
Маълумот учун, аввалроқ Президент фармони билан Хотира ва қадрлаш куни муносабати билан уруш қатнашчилари ва уларга тенглаштирилган шахсларни қўллаб-қувватлаш чоралари белгиланган эди. Унга кўра, ҳар бир фахрийга бир марталик пул мукофоти ажратилиши тасдиқланган.
Мутахассислар фикрича, бу инсонлар нафақат тарихнинг тирик саҳифаси, балки жасорат, матонат ва Ватанга садоқат тимсоли ҳисобланади. Шу боис уларга эҳтиром кўрсатиш ва ғамхўрлик қилиш жамиятнинг муҳим бурчларидан бири бўлиб қолмоқда.
Айни кунларда мамлакат бўйлаб Хотира ва қадрлаш куни муносабати билан турли учрашувлар, байрам тадбирлари ва фахрийлар ҳолидан хабар олиш ишлари ташкил этилмоқда.
“Zamin”ни Telegram'да ўқинг!
