Франциянинг Теҳрондаги элчихонаси ёнида «Францияга ўлим! Исроилга ўлим! АҚШга ўлим!» деган шиорлар кўтарган намойишчилар йиғилган. Улар Франциянинг “Шарли Эбдо” сатирик журналида Эрон Ислом Республикаси етакчиси Оятуллоҳ Али Хоманаийнинг карикатуралари чоп этилгани юзасидан норозилик билдирмоқда.
Эрон Ислом Республикаси расмийлари журналнинг нашр этилишига кескин муносабат билдириб, масъулиятни Франция ҳукумати зиммасига юклади. Эрон Ташқи ишлар вазирлиги «ўзининг исломий, диний, миллий қадриятлари бузилишини қабул қилмаслигини» ва Франциянинг «сўз эркинлиги баҳонасида уларни ҳақорат қилишга ҳаққи йўқлигини» билдирди. Инқилоб гвардияси бош қўмондони эса “Шарли Эбдо” ходимларига 2022 йил август ойида АҚШнинг Нью-Йорк штатида ёзувчи Салмон Рушдига қилинган суиқасдни эслатди.
«Француз нашрининг диний ва сиёсий кучга оид карикатураларни чоп этишдаги ҳақоратли ва беҳаё ҳаракати самарали ва қатъий жавобсиз қолмайди... Биз Франция ҳукуматининг ҳаддидан ошишига йўл қўймаймиз», — деди Эрон ташқи ишлар вазири Ҳусайн Амир Абдуллоҳиён.
Франциянинг Теҳрондаги элчиси Николя Рош Эрон Ташқи ишлар вазирлигига изоҳ учун чақирилди. «Франция сўз эркинлиги баҳонасида мусулмон давлатлари учун муқаддас бўлган нарсаларни ҳақорат қилишга ҳаққи йўқ», - дея ТИВ матбуот котиби Носир Канъоний сўзларидан иқтибос келтирган Ле Фигаро нашри. Эрон ҳукумати 1983 йилда Франция Ташқи ишлар вазирлиги қошида ташкил этилган Франция тадқиқот институти ёпилганини эълон қилди.
Эслатиб ўтамиз, Шарли "Эбдо” сатирик журнали 2015 йилда Муҳаммад пайғамбарнинг карикатураларини чоп этганидан сўнг бутун мусулмон оламини жунбушга келтирганди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
