Буюк Британияда ўпка саратонига қарши вакцинанинг клиник синовлари бошланди

^{Фото: Getty Images}
Лондонда саратон ҳужайраларига қарши иммун тизимини рағбатлантиришга мўлжалланган ўпка саратонига қарши янги вакцинанинг клиник синовлари бошланди. Эксперимент терапиядан биринчи бўлиб Лондон коллежи Унивеститет клиникаси беморлари фойдаланди, дея хабар беради ташкилот матбуот хизмати.

Ўпка саратонига қарши вакцинани ўзида биринчи бўлиб 67 ёшли Януш Рац синаб кўрмоқда. У вакцина саратоннинг қайталанишини тўхтатишига умид қилган ҳолда тадқиқотда иштирок этишга рози бўлганини айтган. Эркакнинг сўзларига кўра, оиласи унинг қарорини қўллаб-қувватлаган, ўзи ҳам сунъий интеллект соҳасидаги олим сифатида бу каби тадқиқотлар нақадар муҳим аҳамиятга эга эканини яхши тушунади.

Ўпка саратонини даволашга мўлжалланган дунёдаги биринчи мРНК-вакцина Германиянинг BioNTech биотехнологик компанияси томонидан ишлаб чиқилган. Келажакда ушбу вакцина кимётерапия ўрнини эгаллаши мумкин.

Дори воситаси иммун тизимини соғлом тўқималарга тегинмаган ҳолда саратон ҳужайраларини аниқлаш ва уларни йўқ қилишини рағбатлантиради. Бундай усул касалланган ҳужайралардан ташқари соғломларига ҳам зарар етказадиган анъанавий кимётерапиядан фарқ қилади.

Олимларнинг таъкидлашича, ўпка саратони бутун дунёда онкологик касалликлар оқибатида юзага келаётган ўлимларнинг асосий сабабчиси бўлиб қолмоқда. Тадқиқот ўпка саратонини даволашнинг янги самарали усулларини топиш ва касалликнинг турли босқичларида беморлар учун прогнозларни яхшилашга қаратилган.

The Guardian’нинг маълум қилишича, вакцинанинг одам устидаги биринчи фаза клиник синовлари дунёнинг еттита давлатидаги 34 та тадқиқот майдончасида бошланган: Буюк Британия, АҚШ, Германия, Венгрия, Полша, Испания ва Туркия. «Замин» янгиликларини «Вконтакти»да кузатиб боринг