295
АҚШ Мудофаа вазирлиги Гренландияда жойлашган Питуффик ҳарбий базаси қўмондони, полковник Сузанна Мейерсни лавозимидан озод қилди. Пентагон бу қарор Трамп сиёсий курсидан оғиш ҳолатлари фонида қабул қилинганини маълум қилди.
“Занжирли бошқарувга путур етказувчи ҳаракатлар ёки президент Трампнинг кун тартибини саботаж қилишга уринишларга йўл қўйилмайди,” — деди Пентагон матбуот котиби Шон Парнелл.
Низога сабаб бўлган электрон хат
Расмий сабаб очиқланмаган бўлса-да, Пентагон эълон билан бирга Military.com мақоласига ҳавола берди. Унда айтилишича, 31 март куни Мейерс база шахсий таркибига электрон хат йўллаб, вице-президент ЖД Венс ташрифидан норозилик билдирган.
“Мен сиёсатни яхши тушунмайман, лекин Венс жанобнинг гаплари Питуффик базаси руҳини акс эттирмайди. Бу ерда барча байроқлар ёнма-ён ҳилпирайди,” — деб ёзган у.
Венс нима деган эди?
Вице-президент ЖД Венс 28 март куни Питуффик ҳарбий базасига ташриф буюриб, оролни Даниядан ажратиб, АҚШ назоратига ўтказиш кераклигини айтган.
“Хитой ва Россия таҳдидига қарши Гренландия хавфсизлигини АҚШ таъминлаши лозим,” — деган у.
Трамп маъмурияти аввал ҳам Гренландияни АҚШга қўшиш ҳақида баёнотлар берган эди.
Дания жавоби: “Гренландия сотилмайди”
Дания Ташқи ишлар вазири Ларс Лёкке Расмуссен Трамп маъмуриятининг бу баёнотларини танқид қилди. Гренландиянинг янги бош вазири Йенс-Фредерик Нильсен эса шундай деди:
“Гренландия сотилмайди. Трампнинг бу ёндашуви бизнинг сиёсий мустақиллигимизга таҳдиддир.”
АҚШ ва Дания ўртасидаги вазият вақт-вақти билан кескинлашиб бормоқда. Оқ уй эса Гренландия бўйича даъволаридан ҳали ҳам воз кечмаган.
Сиз нима деб ўйлайсиз — Гренландия кимники бўлиши керак: Данияникими ёки АҚШники?
12:20, 3-04-2025
