Филиппинда йирик автоҳалокат: Ҳайдовчининг уйқуси ўн кишининг умрига зомин бўлди!

Филиппиннинг Тарлак вилоятида жойлашган Субик-Кларк-Тарлак тезкор автомагистралида аянчли йўл-транспорт ҳодисаси юз берди. Мазкур ҳалокат натижасида тўрт нафари болалар бўлган ўн киши ҳаётдан кўз юмди. Бу ҳақда Тарлак полиция бошқармаси раҳбари Ромел Сантос оммавий ахборот воситаларига маълум қилди.

Ҳодиса қандай юз бергани ҳақида берилган маълумотларга кўра, автобус ҳайдовчиси пулли йўлдан ўтиш учун тўловни амалга ошираётган фургонга қаттиқ зарба билан урилган. Кучли зарба таъсирида фургон навбатда турган бошқа автомобилларга бориб урилиб, занжирсимон тарзда бир нечта транспорт воситаси жиддий жароҳатланган.

Фалокат оқибатида қурбон бўлганларнинг жасадлари ўз автомобиллари ичида қисилиб қолган. Ҳодиса жойига етиб келган махсус хизматлар ва қутқарувчилар ҳалок бўлганларнинг жасадларини транспорт воситаларидан чиқариш учун узоқ вақт ҳаракат қилишга мажбур бўлган.

Полиция раҳбари Сантоснинг айтишича, автобус ҳайдовчиси ҳибсга олинган ва дастлабки сўроқ жараёнида у руль ортида ухлаб қолганини тан олган. Шунингдек, автобусда бўлган йўловчилар енгил жароҳатлар билан омон қолишган.

Ҳалокатга сабабчи автобус ҳайдовчиси Solid North Transit Inc компаниясида ишлаганлиги аниқланган. Воқеа юзасидан мамлакатнинг транспорт вазири Винс Дизон мазкур компаниянинг Филиппиндаги барча фаолиятини зудлик билан тўхтатиш тўғрисида кўрсатма берди. Шунингдек, тергов ишлари давом эттирилмоқда. «Замин»ни Telegram’да ўқинг!