Ғарб Украинага узоқ масофали зарбаларга рухсат берди: чекловлар бекор қилинди

Украинага ҳарбий кўмак масаласида катта бурилиш юз берди. Германия канцлери Фридрих Мерцнинг маълум қилишича, Ғарб давлатлари — Германия, Буюк Британия, Франция ва АҚШ — Украинага етказиб берилган қуроллардан Россия ҳудудидаги нишонларга зарба бериш бўйича аввал қўйилган барча чекловларни расман бекор қилди. Бу ҳақда Германия ОАВлари орқали жамоатчиликка етказилди.

— Украинага етказиб берилган қуролларнинг отиш масофасига ҳеч қандай чеклов қолмаган. Германия, Буюк Британия ва Франция томонидан бундай тўсиқлар йўқ қилинди. АҚШ ҳам бу йўналишда чекловлардан воз кечди, — деди канцлер Мерц.

Бу қарор Украинага стратегик ҳимоя ва жавоб зарбаларини амалга ошириш учун кенг имкониятлар яратиб бериши таъкидланмоқда. Хусусан, у мамлакат Россия ҳудудида жойлашган ҳарбий объектларга қарши курашишда эндиликда узоқ масофали қуроллардан бемалол фойдаланиши мумкин бўлади.

Фридрих Мерц ўз нутқида таъкидладики, Германия Украинага ҳарбий ёрдам кўрсатишда барча имкониятларни ишга солишга тайёр. Шу боис у яқинда Буюк Британия бош вазири Кир Стармер, Франция президенти Эммануэл Макрон ва Польша раҳбари Дональд Туск билан бирга Киевга ташриф буюрган. Бу ташриф "кўнгиллилар коалицияси" доирасида амалга оширилган ва Ғарб давлатларининг қатъий позициясини яна бир бор намоён қилган.

Кремльнинг жавоби

Россия бу қарорларга нисбатан ўз муносабатини билдиришга улгурди. Президент матбуот котиби Дмитрий Песков ушбу чекловларнинг бекор қилиниши сиёсий келишув ва мавжуд дипломатик уринишларга зид ҳаракат эканини айтди. У буни “етарлича хавфли ечим” деб баҳолади.

Шу пайтгача Ғарб давлатлари томонидан Украинага етказиб берилган узоқ масофали қуроллардан Россия ҳудудидаги нишонларга қарши фойдаланиш тақиқланган эди. Бу — можарони кескинлаштирмаслик ва тўғридан-тўғри тўқнашувдан сақланиш мақсадида қўлланган сиёсий чоралардан бири эди.

Бироқ сўнгги ойларда вазият кескин ўзгармоқда. 2024 йил ноябрида АҚШнинг ўшандаги президенти Жо Байден илк бор Украинага узоқ масофали ATACMS ракеталаридан Россия ҳудудидаги стратегик объектларга қарши фойдаланишга рухсат бергани ҳақида хабар тарқалган эди. Шунингдек, Буюк Британия ҳам Storm Shadow қанотли ракеталаридан фойдаланиш бўйича чекловларни бекор қилган.

Франция ҳам худди шундай қарорни қабул қилгани айтилган, аммо бу маълумотлар расмий равишда тасдиқланмаганди. Эндиликда эса Германиянинг энг юқори даражали расмийси буни оммага очиқ эълон қилди.

Бундай қарорлар можарони янги босқичга олиб чиқиши мумкин. Украинага узоқ масофали қуролларнинг тўлиқ эркин фойдаланилиши Россия ҳудудидаги ҳарбий ва логистика нуқталарига таҳдид солади. Бу эса Москва томонидан кескин жавоб реакциясини келтириб чиқариши эҳтимолдан ҳоли эмас.

Мазкур вазият халқаро сиёсий саҳнада янги зиддиятлар келиб чиқишига асос солиши мумкин. Киев учун эса бу ўзини ҳимоя қилишда стратегик устунлик ва янги ҳарбий имкониятлар эшигини очиши аниқ.