Владимир Путин: «Киев режими терроризм йўлидан бормоқда»

Россия президенти Владимир Путин ҳукумат аъзолари билан бўлиб ўтган учрашувда Брянск ва Курск областларида темирйўллар портлатилишини «террорчилик ҳаракати» деб атади. Бу ҳақда «Интерфакс» агентлиги хабар бермоқда.

«Яқинда Брянск ва Курск областларида содир этилган темирйўл портлатишлари – бу террорчилик ҳаракатлари ҳисобланади ва бундай жиноятларни амалга ошириш тўғрисидаги қарор, шубҳасиз, Киев раҳбарияти томонидан сиёсий даражада қабул қилинган», – деб таъкидлади Путин.

Шу билан бирга, Россия етакчиси қуролли тўқнашувлар чоғида тинч аҳолининг жабр кўриши ҳамиша ачинарли ҳолат бўлиб қолишини қайд этиб ўтди.

«Барча қуролли можароларда, афсуски, тинч аҳоли вакиллари зарар кўради. Биз бу ҳолатларни чиндан ҳам афсус билан қабул қиламиз», – деди Путин.

Унинг таъкидлашича, Брянскдаги воқеа айнан тинч аҳолига қарши қаратилган қасддан уюштирилган ҳаракат бўлиб, халқаро меъёрларга мувофиқ, бундай жиноятлар террорчилик сифатида баҳоланади.

Россия президентининг сўзларига кўра, Брянск ва Курск областларидаги темирйўл портлашларининг асосий мақсади – Истанбулда Россия ва Украина ўртасида бўлиб ўтаётган тинчлик музокараларини бузишдан иборат.

«Биз Истанбулда таклиф қилган тинчлик музокаралари босқичи олдидан тинч аҳоли, жумладан, аёллар ва болаларга қарши уюштирилган бу каби жиноятлар музокаралар жараёнига зарар етказишга қаратилган эди. Бундай ҳаракатлар ҳозирда Киевдаги ҳокимиятни эгаллаб турган ноқонуний режимнинг тобора террорчи гуруҳга айланаётганини ва унинг ғарблик ҳомийлари ҳам бу жараёнда террорчиларнинг шерикларига айланиб бораётганидан хавотирга тушишимизга асос бўлади, холос», – деди Путин.

Россия президентининг фикрича, Истанбул музокараларида Россия делегациясининг таркиби ва ваколати халқаро ҳуқуқ нормаларига мувофиқ равишда Москва томонидан белгиланади ва бу масалани баҳолашга Киев расмийларининг ҳеч қандай ҳуқуқи ҳам, ваколати ҳам йўқ.

«Халқаро амалиётларга кўра, музокаралар даражасини ва таркибини фақат ўша мамлакат белгилай олади. Бу даражани бошқа томондан баҳолашга фақат юқори компетенция ва нуфузга эга бўлган шахслар ҳақлидир. Лекин бугун Курск вилоятида аскарлари оғир мағлубиятга учраб, жанг майдонида йирик йўқотишларга дуч келаётган режим вакиллари қандай компетенцияга эга бўлиши мумкин? Биз ҳеч қандай ваколати йўқ, ҳатто элементар сиёсий маданиятдан ҳам йироқ одамлар билан иш олиб боряпмиз», – деб қайд этди Путин.

Россия раҳбари Киевнинг гуманитар асосларда қисқа муддатли ўт очишни тўхтатишга розилик беришни рад этиши ҳам Украина режимига тинчликнинг керак эмаслигини тасдиқлашини айтди.

«Киев режими бир неча кунлик гуманитар асосдаги ўт очишни тўхтатишга рад жавобини бергани биринчи ҳолат эмас. Бу биз учун ажабланарли эмас, аммо шуни аниқ кўрсатадики, бугунги Украина раҳбарияти учун тинчликнинг ўзи ҳокимиятни йўқотиш билан баробардир. Бу режим учун ҳокимият нафақат тинчликдан, балки ўз фуқаролари ҳаётидан ҳам устун туради», – деди Россия етакчиси.

Путин ўз нутқида Украина раҳбарияти томонидан тинч аҳолига қарши содир этилган охирги террорчилик ҳаракатлари ортида тинчлик музокаралари ва юқори даражадаги саммит ўтказиш ҳақидаги таклифларга шубҳа билан қарашини ҳам билдириб ўтди.

«Айни вақтда улар ҳарбий ҳаракатларни 30 ёки 60 кунга тўхтатишни сўрамоқда, юқори даражада учрашув ўтказишни исташмоқда. Лекин бундай шароитда қандай музокаралар бўлиши мумкин? Биз нима ҳақида гаплашамиз? Террорга қўл урган, террорчи усулларни қўллайдиган одамлар билан қандай келишувлар бўлиши мумкин? Ва нима учун биз уларни қўллаб-қувватлашимиз керак? Ғарб режимни янада кўпроқ қурол билан таъминлаши, мажбурий сафарбарликни кенгайтириши ва Брянск ҳамда Курскда содир этилган ҳужумларга ўхшаш террорчилик ҳаракатларига тайёргарлик кўришини қўллаб-қувватлаш учунми?» – деб ўз сўзларини якунлади Владимир Путин. «Замин»ни Telegram’да ўқинг!