АҚШ сиёсий саҳнасида кескин тус олаётган воқеалар фонида Доналд Трампнинг мухлислари томонидан навбатдаги можароли ҳаракат амалга оширилди. Сиёсий босим ва шахсий таъқибнинг янги йўналишида American Accountability Foundation (AAF) номли ўнг қарашдаги ташкилот 175 нафар федерал амалдор ҳақидаги тўлиқ маълумотларни оммага эълон қилди.
Maзкур жадвал нафақат ишчиларнинг исмлари ва лавозимларини, балки уларнинг фотосуратлари ва шахсий маълумотларини ҳам ўз ичига олган. AAF уларни радикал сўл ғояларни, айниқса, хилма-хиллик, тенг ҳуқуқлилик ва инклюзивликни тарғиб қилишда айбламоқда, деб хабар берди reuters.com.
Ушбу ҳаракат натижасида рўйхатга киритилган шахслар турли шаклдаги таҳдидлар, жамоатчилик босими ва онлайн таъқибларга дуч келган. Таассуф билан таъкидлаш жоизки, баъзилари ишдан бўшатилган, иккита ходим эса шахсий хавфсизлигидан хавотир олиб, мамлакатни тарк этишга мажбур бўлган. Бу ҳолат, Reuters томонидан 7 август куни эълон қилинган суриштирувда алоҳида тилга олинган.
Таъкидлаш жоизки, ушбу рўйхатдаги баъзи амалдорлар ҳозирги демократик маъмуриятда эмас, балки аввалги республикачи ҳукумат даврида ҳам ишлаган, яъни уларнинг фаолияти партиялараро бўлган. Бироқ улар ҳам "инклюзив қарашлар" билан боғланганлиги сабаб турли танқидларга учраган.
Шу билан бирга, American Accountability Foundation ўз фаолиятини аста-секин Жо Байден маъмурияти атрофидаги мухолиф фикрли шахсларга қарши йўналтирилган ташкилотдан Доналд Трампнинг қайта сайланиш кампанияси учун қуролга айлантирмоқда. Бу эса АҚШда сиёсий курашнинг шахсий таҳдидлар даражасигача етиб борганини кўрсатади.
Маълумотларга кўра, рўйхатдаги 88 нафардан зиёд шахс ҳукумат таркибини тарк этган, қолганлари эса маъмурий таътилга чиқишга ёки вазифасидан ўз хоҳиши билан кетишга мажбур бўлган. Баъзилари ишдан бўшатилган, баъзилари эса лавозимдан четлатиш ёки вазифани алмаштириш билан таҳдид қилинган ҳолда ишдан кетишган.
Бундай вазият, албатта, давлат хизматчилари хавфсизлиги ва уларнинг шахсий ҳуқуқлари борасида жиддий саволларни пайдо қилмоқда. Сиёсий қарашлардан қатъи назар, хизматчиларни оммавий тарзда таъқиб қилиш Америка демократик қадриятлари билан мутлақо мос келмайди.
Кўзгу олдида турган бу воқеа сиёсий қарама-қаршиликлар қай даражада шахсий ҳаётга аралашиб кетганини яққол намоён қилмоқда. Жамоатчилик эса бу жараён қандай якун топишини қизиқиш билан кузатмоқда.
