Ветнамда ярим миллион одам хавфли тайфун сабабли эвакуация қилинди

Ветнамда кучли бўрон яқинлашаётгани боис 586 мингдан ортиқ одам ўз уйларини тарк этишга мажбур бўлди. Душанба куни эрталаб бўрон мамлакат қирғоқларига етиб келиши кутилмоқда. Ҳозирда шамол тезлиги соатига 166 километрни ташкил этмоқда ва янада кучайиши мумкин.

Энг катта хавф Ветнамнинг марказий вилоятларида кузатилмоқда. Шу сабабли бу ҳудудларда аҳолига уйларини тарк этиш буюрилди, самолёт рейслари бекор қилинди ва кемаларга денгизга чиқиш тақиқланган.

Бўрон Хитойнинг Хайнан ороли яқинидан ўтмоқда ва бу ерда 320 миллиметргача ёмғир ёғиши тахмин қилинмоқда. Ветнамда эса 300–400 миллиметр ёмғир ёғиши ва шамол тезлиги 200 км/соатгача етиши мумкин. Шунингдек, денгизда 2–4 метр баландликдаги тўлқинлар кутилмоқда.

Расмийлар якшанба куни 14:00 дан кейин одамларни ташқарига чиқмасликка чақирди. Ҳарбийлар фуқароларга ёрдам бериш учун жалб қилинди. Мутасаддилар бўронни “ўта хавфли” деб атаб, балиқчилик, туризм ва бошқа фаолиятлар учун мутлақо мос эмаслигини айтмоқда.

Ветнам Аирлинес камида 22 та рейсни бекор қилди. Мутахассислар бу сафарги тайфун ўтган йили юз берган бўрон каби катта талафотлар келтириб чиқариши мумкинлигидан хавотирда. Ўша вақтда Ветнамда 300 киши ҳалок бўлган эди.